KUCHING: Bisi 700 pegawai enggau raban polis ari Kontinjen Sarawak ari mayuh pampang ngambi bagi ba Program Advokasyen Kimpin Pengelikun Jalai Alun Sebedau Hari Krismas 2025.
Sapit Kepala Polis Sarawak, DCP Saifullizan Ishak madah, kimpin nya diatur ungkup tuju meri pemereti enggau pengeleda ngagai mensia mayuh bekaul pengelikun sereta ngasi ke atur undangundang jalai alun.
“Kitai keran deka nyamin pengelantang penguna jalai alun ngena chara nganjung bala pegawai enggau raban polis ba endur ti nyadi penusah bebadi jalai alun.
“Berebak enggau nya, kitai deka nentuka arus trafik lanchar sereta dijaga dikena ngurangka tikas penusah bebadi ba jalai alun nengah pengawa neritka undangundang enggau atur trafik sepemanjai timpuh pengerami,” ku iya.
Saifullizan bejaku munyi nya pengudah bejadi Program Advokasyen Kimpin Pengelikun Jalai Alun Sebedau Hari Krismas 2025 di Farley Batu 6 ditu, kemari.
Iya ngelalau mensia mayuh seruran nitih ke atur pengelikun jalai alun enggau gerah ari raban ti bejalaika pengawa sepemanjai musin pengerami tu.
Ku iya, atur ti terit deka dipejalai ngagai penguna jalai alun ti ngelanggar atur trafik ti udah ditetap.
“Seruran ngemerat pengelikun diri empu enggau diri sebilik lalu ingat mih orang ti dikesayau kitai.
“Ngarap kimpin tu ulih nyapai juluk,” ku iya.
Kimpin Pengelikun Jalai Alun Sebedau Hari Krismas 2025 deka dipejalai pengelama enam hari belabuh ari 23 nyentuk 28 Disember tu ba semua pelilih menua ti dipegai Kontinjen Sarawak.
Ba lansa bukai, iya ngarap gaya ampuh bah di menua tu ulih terus dipatau kelebih agi pengudah pengerami Hari Krismas tembu.
“Naka diatu, kami meda gaya hari agi ulih dipatau sereta likun laban bedau bisi kandang endur ti ampuh bah.
“Taja pia, kitai semampai besikap tumu ari penusah ti enda disadang nyadi,” ku iya.
