LUNDU: Ejensi Kampung Sarawak (SFC) mujur ngelepas 85 anak penyu agar ba Pantai Pugu dikena nyaga pemeruan biodiversiti sereta nyukung pemansang ekonomi lokal.
Pemujur tu asil kerejasama komuniti lokal nengah Projek No. 35, Transformasyen Menua Pesisir nengah Kaul Komuniti ba Pengawa Ngintu Biodiversiti enggau Servis Ngintu Palan Nyaga.
Ku penerang SFC, program nya dipejalai seraris enggau aspirasyen Strategi Pemansang Pengudah COVID-19 (PCDS) 2030 ti ngemerat pemansang gadung, pemeruan rampa menua sereta kerejasama komuniti nyungkak ekonomi lokal.
Dua sarang penyu agar ti dipatau rat raban pematau mujur netas sebedau anak penyu dilepas baru ngagai endur asal sida.
Pengawa ngintu nya mega disempulang volunteer komuniti di Lundu ti udah bejalaika latih khas ba pengawa matau, nyaga sarang sereta aktiviti ngelepas anak penyu.
Kerejasama sida nunjukka pengawa ngintu biodiversiti ulih dipejalai inklusif enggau sukung rat komuniti nengah Community-based Turtle Conservation Rangers Programme.
“Inisiatif tu dikearap ulih meri pemaik ekonomi terus ngagai peranak lokal kelimpah narak pengeleda senentang pemesai guna nyaga rampa menua,” ku penerang nya. Ku penerang nya baru, inisiatif begulai baka tu nyata nyukung juluk PCDS 2030 dikena negap pemansang sosioekonomi menua pesisir chara meruan.
