“Kitai ngelaluka temuai tang enti sida ti datai enggau pengingin deka ngenataika penanggul ngagai kitai sigi enda dikelaluka.”

MIRI: Kepala Menteri Datuk Patinggi Abang Johari Tun Openg sekali agi madahka orang luar ti bisi niat enda manah sigi ditagang tama ngagai Sarawak.

Jaku iya dibacha Menteri Perengka Pengangkut Datuk Lee Kim Shin maya Program Bejalai Bebala Mayuh Krismas Mengeri Miri (MCCP) 2019 di City Fan ditu, ensana.

“Kitai ngelaluka temuai tang enti sida ti datai enggau pengingin deka ngenataika penanggul ngagai kitai sigi enda dikelaluka,” ku iya.

Kelimpah nya, Abang Johari mega nekanka, Perintah Sarawak deka terus nyukung aktiviti enggau pengarap bukai nengah penumbuh Unit Pengarap Bukai (Unifor) dikena nyaga penyerakup pengarap begulai di menua tu.

“Ba konteks tu, patut diingatka Sarawak nyadi sebuah nengeri ti meri bantu belanja ngagai pengarap bukai kelimpah pengarap Islam enggau berstruktur nengah penumbuh Unifor,” ku iya.

Lebih 45,000 sida ti bepengarap Kristian enggau mensia mayuh datai ngagai Padang Kipas Miri beserimbai enggau Program MCCP, ensana.

Pengawa nya diatur gerija Seventh-Day Adventist enggau rambai jaku ‘We Are One In Christ – Rome 12:5’.

Pengawa nya mega nyadi program ti ke-12 kali kala diatur lalu digulu 15 buah gerija bukai di pelilih Miri kelimpah belagu Krismas enggau betanda.

Maya pengerami nya mega Abang Johari ngagihka RM50,000 belanja ngagai Gerempung Gerija-gerija Sarawak di Miri dikena ngatur pengawa ti sebaka tauka aktiviti bukai enggau mensia mayuh.

Nangkan nya, Kim Shin mega madahka iya mega mantu meri agih belanja RM10,000 dikena ngatur pengerami bejalai bebala mayuh tu.

Sama datai Datuk Bandar Miri Adam Yii, Adun Telang Usan Dennis Ngau enggau Chairman MCCP 2019 Pastor Andrew Ganya.