Apai Bonnie minta bantu rumah PPR

KUCHING: Ex-atlit angkat berat (powerlifting) menua, Gustin anak Jenang, ngarapka perintah ulih ngamatka jaku meri bantu ngagai sida sebilik berekat ari pemujur anak iya Bonnie Bunyau udah bulih midul emas ba Pekit Dunya di Bangkok, Thailand, apin lama ke udah.

Kenu ku Gustin, kenyau ari iya empu ti kala ngarika nengeri Sarawak ba Lumba Para Sukma (Lumba Malaysia) enggau ngarika Malaysia ba Pekit Angkat Berat renggat entarabansa kala ngenataika peminta bantu rumah PPR (Program Perumahan Rakyat) tang nyentuk ke sehari tu nadai sebarang timbal.

“Nya alai, minta kasih ngagai perintah ngemujurka peminta aku bulih bantu rumah PPR. Amat pan kami udah bisi rumah ba Kampung Mawang Baru, Taie, Serian tang enti bisi rumah bantu ba mengeri tentu bala anak muntang agi nurun belatih.

“Siku agi anak aku, Bryan Jusnancey mega atlit angkat berat ungkup Para Sukma ngarika Sarawak, enti enda ketegal Pandemik tu iya endang nurun belatih. Siku agi, Bonnie iya diatu neruska latih angkat berat ba Kuala Lumpur,” ku iya maya dirandau Suara Sarawak, kemari.

Sebedau tu mega, Sapit Kepala Menteri Tan Sri James Jemut Masing bisi mansutka jaku meri pengaga ati ngagai pemujur empat anak Sarawak ke udah ngangkatka nama Sarawak ba tikas entarabansa iya nya Pandelela Rinong, Nicodemus Manggoi Moses, Bonnie Bunyau Gustin enggau Francisca Luhong James.

Bonnie Bunyau anak Gustin menang midul emas ba Pekit Powerlifting Dunya Para di Bangkok, Thailand apin lama ke udah.

Nangkan ke nya, Masing bisi madahka pemujur sida tu ke udah ngemegagka nama Sarawak endang patut dibalas enggau insentif.

Berebak enggau nya, kaban Komiti Gerempung Veteran Soldadu Kor Renjer (PVTKR) Pegawai Waran II (B) Klement Nyapong madah, ungkup penemu niang apai Gustin iya nya Sarjan Jenang siku ari kaban veteran Soldadu 1 Renjer ke udah nadai dalam taun 2010.

“Nya alai endang patut sida tu sebilik nerima bantu perintah, ari niang apai Gustin empu siku orang ke kala gawa ngetanka menua, ditangkan enggau tubuh uchu Sarjan Jenang, iya nya Bonnie diatu iya sekali agi bebendar ngangkatka nama menua Malaysia ba tikas dunya.

“Aku ngarika PVTKR meri tabi puji ngagai sida Bonnie sebilik, “ku Klement.

Sebedau tu, Klement ngarika PVTKR bisi betemu enggau Gustin empu lalu mendingka sebana iya lalu ngarapka pekara nya nerima perati ari Opis Menteri Pengawa Berumah enggau Pemansang Kandang Menua Sarawak.

Suara Sarawak