KUCHING: Begunan Astana Nengeri Sarawak ti berumur lebih 100 taun deka digaga baru.
Menteri Dagang Temuai, Industri Kreatif enggau Seni Pemerindang Datuk Seri Abdul Karim Rahman Hamzah madahka pengudah begunan baru tu tembu digaga ila, begunan Astana Nengeri ti bisi diatu nya deka nyadi muzium.
“Aku udah meda perambu nya, aku besetuju enggau nyukung perambu tu.
“Nyema begunan Astana lama nyadi muzium, kitai ulih ngayanka artifak ti bekaul enggau gabenor ba dalam nya,” ku iya.
Karim bejaku munyi nya rambau aum pemberita Pengerami Anugerah Pengemeran Seni Sarawak 2023 ba Balai Aum Mulu, Begunan Baitulmakmur 2, ditu kemari.
Ku iya, Astana mayuh nyimpan tepa tauka pemeri ti diberi ngagai Tuai Pemegai Menua ke alai kereban nya ulih disimpan ba galeri Astana lama pengudah Astana Nengeri baru tembu digaga.
Tundu iya, langkar enggau taba Astana Nengeri baru udah dikelala tang pelin perambu tu digaga dibaruh Opis Premier Sarawak.
“Aku pechaya semua udah dalam perambu ti meruan, engka nganti lampu gadung endur berengkah.
“Astana baru deka nyadi sebuah begunan ti manah sereta nyelai, lalu nyadi kelai temegah menua kitai,” ku iya.
Ungkup penerang, Astana Nengeri kediatu nyadi palan diau rasmi Tuai Pemegai Menua ti digaga Rajah Sarawak Kedua, Charles Brooke ba taun 1870 suba.
Begunan nya mega kala nyadi palan rasmi James Brooke lebuh iya diangkat nyadi pemerintah Sarawak ba taun 1841.
Apin lama, dalam sebuah portal berita menua, begunan baru Astana Nengeri deka digaga ba sebidang tanah entara Jalai Astana Lot enggau Taman Botani Sarawak.
