KUCHING: Stesyen Televisyen Sarawak (TVS) deka bisi begunan kediri ti disadang tembu 2027.
Premier Sarawak, Datuk Patinggi Tan Sri Abang Johari Tun Openg madah, begunan nya ila deka digaga semak Bangunan Baitul Makmur di Petra Jaya, ditu.
Ku iya, begunan nya disadang tembu taun 2027 nyerumba Lumba Asia Tenggara (SEA) ti ngemuntang TVS nabur berita ngagai selampur menua alai Sarawak mega sebagi ari kelang ngatur pekit nya.
“Kitai ngarapka begunan baru tu ulih tembu ba taun 2027 laban kitai sama nyadi tuai rumah Lumba SEA 2027. TVS udah tentu deka dilempai pengawa nabur berita pekit ke bisi diatur di Sarawak.
“Nya alai, kitai ngarap begunan nya ulih tembu, disikap studio moden ti nabur berita terus ngagai menua ke ngambi bagi ba pekit nyengkaum Indonesia, Singapore enggau Gerempung Menua Asia Tenggara (ASEAN) ke bukai,” ku iya.
Abang Johari nibar ke jaku nya ba Pengerami Aidilfitri TVS 2025 Begulai enggau Premier Sarawak di Palan Konvensyen Borneo Kuching (BCCK), ditu tadi.
Iya madah, taba begunan baru nya ila deka digaga semak Palan Seni Pemerindang Sarawak lalu deka meri awak TVS ngatur program besai nyengkaum konsert enggau seni pemerindang ke ulih mandangka budaya menua tu ti mayuh macham penyelai.
