KUCHING: Dewan Bahasa dan Pustaka (DBP) Pampang Sarawak nyelinting ngena chara baru ungkup marit raban nembiak rebak baru ba bidang jaku enggau litaricha dikena ngerembaika program sida ngagai pupu bansa enggau etnik di nengeri tu.
Direktor DBP Pampang Sarawak, Dr Azizul Ismail madahka pengawa nya entara batang pekara diperati sida sebedau ngintu genap 50 taun DBP Sarawak ditumbuh.
“Raban nembiak ukai semina nyadi penyereta aja, tang sida ngesan tanggungpengawa nampung pengawa ngenegapka jaku enggau litaricha.
“Chara tu mega nyengkaum ngena teknologi digital, kelimpah ari ngenang jasa pengarang enggau tokoh ti udah lama ngaul diri ba bidang jaku enggau litaricha.
“Kami andal deka nempa nembiak rebak baru ti ngembuan identiti ti tegap, rinduka jaku enggau litaricha sereta nyadi penyaup, ukai semina berati ke ni pengelama sida ngaul diri,” ku iya.
Azizul bejaku munyi nya pengudah ngatur penemuai basa ngagai Tuai Pegawai Eksekutif (CEO) Suara Sarawak enggau Sarawak Tribune, Datuk Dr Jeniri Amir ba Indu Opis Suara Sarawak, ditu tadi.
Ku iya, program jaku enggau litaricha nya mega diperambu dikerembai ngagai mayuh bengkah pelilih menua kelebih agi di kandang menua ulu, ngambi raban pemekuh enggau pengarang menua ulih mantaika asil sida ngagai komuniti menua.
