MULU: Mulu Eco Challenge 2026 dipeda nyadi pelasar strategik negap sektor eko dagang temuai Sarawak kelebih agi ba menua ulu lalu ngelaku pemanah rampa menua ngagai tikas antarabansa.

Program diatur Opis Menteri Dagang Temuai, Industri Kreatif enggau Seni Pemerindang Sarawak begulai enggau GRIT Event Management nya diatur pukul 7 pagi ba Pelilih Mit Mulu kena Hari Lima lalu digulu penyereta ari mayuh endur ti datai nguji pengetan tubuh enggau runding.

Pengawa ngelepas bala penyereta mujur dipenyadi Sapit Menteri ba Opis Premier Sarawak (Pengereja Kasar, Imigresyen enggau Patau Projek) ti mega Kaban Kunsil Nengeri (ADUN) Mulu, Datuk Gerawat Gala.

Iya nyemetak madah, lumba baka tu ukai semina meransang gaya idup bepengerai, tang mega ngelaku palan dagang temuai bepelasarka rampa menua Sarawak ngagai dunya luar.

“Program baka Mulu Eco Challenge tu ulih meransang sektor dagang temuai tumbuh kelebih agi matak minat temuai sereta pengemeran lumba ekstrem ari menua tu enggau menua luar,” ku iya.

Iya mega madah, penyelai Gunung Mulu National Park ti diaku nyadi Taba Pesaka Asal Dunya UNESCO enggau pesaka gua batu kapur, kampung ujan tropika sereta biodiversiti ti kaya ngujungka endur nya nyadi palan pematak eko dagang temuai di Sarawak.

Iya mega meri terima kasih ngagai raban pengatur sereta semua ti nentuka atur program nya lanchar.

Sama datai, Pegawai Pelilih Marudi, Rose Edward Tarang, Pegawai Pelilih Miri, Siti Rohani Yusof sereta Direktor Program Eco Challenge 2026, Awang Saifeluddin Awangku Karim.- EDISI UKAS