Bintulu: Nasip raban tasah angus di Kampung Sebuan Besar chukup negu tangkai ati Kaban Kunsil Nengeri (ADUN) Jepak, Iskandar Turkee.
Berebak enggau nya, iya meri bantu perengka sekula ngagai bala anak raban tasah nya ensanus.
Iya ti bela dibantu Tuai Indu Parti Pesaka Bumiputera Bersatu (PBB) Jepak, Noriha Ali mai empat ruang bilik raban tasah nya meli perengka sekula.
Nya dikena ngelempung tating belanja raban nya sereta ngambi anak sida ulih nerus pengawa besekula baka selama.
Bisi tujuh anak raban tasah nya nerima bantu uniform sekula enggau kereban tulis ngambi sida ulih nerus sesyen besekula.
“Alhamdulillah, sehari tu (ensanus), kitai bepeluang mantu ngelempung tating belanja ruang bilik raban tasah tu.
“Kami ngarap bala anak tu ulih belajar lantang baka selama enggau enda tinggal ba pelajar,” ku iya.
Iya bela ngerah sebarang ruang bilik raban tasah ti bedau nerima sebarang bantu datai ngagai Palan Servis ADUN Jepan dikena ngulih sukung ti patut.
“Aku meri terima kasih ngagai Premier Sarawak, Datuk Patinggi Tan Sri Abang Johari Tun Ipeng ti semampai ngemerat guna tuai semak enggau rayat sereta ngaul sida ti dituntung penusah,” tampung iya.
Ungkup rikod, penusah ti nuntung enam iti rumah di Kampung Sebuan Besar nya nyadi kena Hari Dua tu tadi.
Nya ngujungka 26 peranak dia ti nguan rumah nya lenyau palan ngenduh enggau barang diguna sida ninting hari.
