KUCHING: Jaku Kaban Parlimen Bintulu Datuk Seri Tiong King Sing pasal “DG takut mati” ngasuh tekenyit sereta meri malu, pia ku Datuk Abdul Karim Rahman Hamzah.
Menteri Dagang Temuai, Seni enggau Main Asal nya madahka jam penusah tu, bala raban gawa ba luan kelebih agi ba bidang perubat udah bebendar nyaga pengelantang semua.
“Ba penemu aku, iya (King Sing) enda patut mantaika ulah baka nya ba Aum Parlimen enggau bejaku nyebut “DG takut mati”.
“Kebuah pia laban iya nya siku kaban politik lalu kitai mesti bebasaka sida ti udah bebendar nyaga pengelantang enggau pengerai kitai ngelama tu,” ku iya nerang.
Abdul Karim mansutka jaku nya ba aum pemberita ti diatur pengudah renggat keterubah Aum Dun, ditu kemari.
Nambahka nya, iya pechayaka nadai sapa lantang ati enggaupengerekai Covid-19 lalu bisi pengandal ngagai Opis Menteri Pengerai Malaysia (KKM) laban udah bebendar nagang pengerekai igi penyakit ngelama tu.
“Iya (King Sing) nya siku ari raban GPS tang kami enda rinduka pekara ke nyadi tu,” ku iya nyemetak madah.
Ngelansa silik pasal isu King Sing ti mantaika penemu ngarika orang bukai, Abdul Karim madahka iya lebih nemu baka ni ngena jaku ke ensuruk enggau bejimat agi.
“Lebuh beratika chara Tan Sri Dr Noor Hisham Abdullah gawa, iya endang lurus ati enggau keran nagang pengerekai igi penyakit tu,” terang Abdul Karim.
Dulu ari nya, ba Aum Parlimen (11 November), King Sing udah mansutka jaku munyitu, “DG hari-hari hanya buat berita sahaja, kenapa tak turun padang melawat setiap hospital? DG takut mati kah?.
Penerang King Sing nya nerima perati Dr Noor Hisham lalu Dr Noor Hisham madahka, iya ke nyadi orang Islam nerima pemati nya ba dini-dini endur enggau ukai semina ulih nyadi maya ngabas pesakit aja.
