BINTULU: Jalai Tun Ahamad Zaidi deka ditutup sementara berengkah ari pukul 5 lemai tu (Hari Enam) ungkup meri awak ngagai pengawa muka tumu Jematan Jepak pagila (Hari Minggu tu).
Pengawa nutup jalai nya ngaul jalai biluk ke kanan nuju ngagai Jalai Kambar Bubin lalu deka diterit nyentuk notis diberi.
Kaunsil Pemansang Bintulu (BDA) madah, pengawa nutup jalai nya sebagi ari inisiatif dikena nentu pengawa bejadi jematan nya lanchar kelimpah nyaga pengelikun penguna jalai alun ti betengah ke jalai nya.
“Kami ngelalau mensia mayuh ngasika atur pengelikun ba endur nya sereta ngena jalai puntang ti udah disedia.
“Jalai pusin U ba baruh Jematan Jepak ti tembu digaga nya ulih dikena ungkup ngurang penanggul sekut arus trafik ,” ku penerang nya.
BDA bela ngelalau bala deriba ngambi seruran bejimat sepanjai pengawa nutup jalai nya dikena nyeliah sebarang penusah ti enda disadang nyadi.
Mensia mayuh dilalau merambu pejalai sida tumu sereta ngasika pal jalai enggau atur raban bekuasa ti nyaga endur nya.
Enti deka nemu penerang silik, penguna jalai alun ulih ngelawa website enggau media sosial rasmi BDA.
