KUCHING: Jerita idup Juliet ti ngelaban penyakit nya ngayanka pemesai guna pengeleda pasal riman tusu, kelebih agi nemu tumu enggau akses perubat ti sebela, kelebih agi ba indu biak enggau komuniti menua pesisir. Kelai solidariti enggau inisiatif nambah pengeleda komuniti, siku orang ti negi reti riman tusu, Dr. Melissa Lim ti mega kaban Sarawak Breast Cancer Support Group besemaya ngelasu pala enggau Juliet ba siti kimpin ngiga belanja.
Pia mega, Menteri Pemansang Indu, Nembiak Mit enggau Pengelantang Komuniti Sarawak, Datuk Seri Fatimah Abdullah bisi ngatur pejalai ke Palan Pansik Klinikal (CRC) di Sepital Besai Sarawak (SGH) ngambi meda pengawa pansik klinikal enggau ngabas pesakit riman tusu nyadi sebagi ari inisiatif nambah pengeleda pengerai indu.
Ba pejalai nya, iya bisi limpang berandau enggau siku pesakit riman tusu triple negative, Juliet Lau, 41, ti diatu benung berubat kemoterapi.
Kimpin nya ngiga belanja sepenyampau RM30,000 dikena nyukung program pelajar pengerai tusu ti deka dikerembai ngagai kandang menua pesisir, komuniti nadai tentu bulih servis pengerai sereta raban dikemelu ba selampur Sarawak.
Nengah kimpin tu, mayuh agi indu dikearap ulih ngelala kelai tumu riman tusu enggau nganjung diri berubat tumu. Ku iya, randau enggau Juliet nya peneleba berega sereta meri peransang ngagai pengawa nambah pengeleda ngagai komuniti pasal penyakit nya.
“Juliet tu siku indu biak ti ditepan riman tusu lalu iya ngembuan pengeliat ati enggau pengepuh. “Jerita iya ngingatka kitai riman tusu tu ulih ngeruga indu enda ngira umur lalu beguna bendar ngeleda tumu sereta nganjung diri berubat ba maya ti patut,” ku iya ensanus.
Iya nyemetak madah, Perintah Sarawak ransing negap bantu ngagai pesakit enggau sida sebilik ti tusah ketegal riman sereta nentuka akses berubat ulih diterima semua orang sekali ke ba mengeri tauka menua pesisir.
Iya mega muji pangku pengawa raban meri bantu komuniti baka Sarawak Breast Cancer Support Group ti chakah mantu nambah pengeleda enggau meri sukung ngagai pesakit sekumbang sida berubat.
“Lebuh komuniti, pengintu pengerai enggau penengkebang polisi bekerejasama, kitai ulih ngedut takah ba pengawa nyaga riman enggau meri peluang ngagai tetiap indu nemu tumu enggau bisi pengarap ulih suman,” ku iya.
Entara pangku pengawa CRC nyengkaum bejalaika pansik klinikal, nyukung tungkap perubat, nyendiaka perengkaguna pansik moden, ngatur latih enggau pemansang kapasiti, kelimpah negap kerejasama antarabansa ba pengawa pansik pengerai.
Pengawa nya mandangka raban hospital ransing ngaga penemu baru ti meri pemaik ukai semina ngagai rayat Sarawak aja, tang rayat Malaysia mega.
Iya ditaga bekunsi penemu ba Gempuru Besai enggau Kongres Saintifik Ke-13 Asia Pacific Organization for Cancer Prevention (APOCP) 2026 ti diatur di Kuching.
Kisah pemerani Juliet mega ngayanka juluk besai agi ba gempuru nya, nentuka nadai indu dikelaung ari bulih peluang nemu tumu enggau berubat nitih pematut. – EDISI UKAS
