TUSUN 8 (Kepenudi)

Taun 1962 lepas penyarut ba menua Brunei chelap, dia menua Sarawak ga angat ketegal keruga raban komunis ti nguji nagang Sarawak enggau numbuhka Malaysia.

Entara raban ke enggau mantah Sarawak nyadi bakih kunsi dalam Malaysia maya nya Parti Sa’ati Rayat Sarawak (SUPP) ke diiring Ong Kee Hui enggau Stephen Yong.

Pengawa mandangka pengeringat bisi diatur ba sekeda pasar di Sarawak lalu ulah nya balat bendar ngeruga pengelikun mensia mayuh.

Maya nya Sarjan Menggong anak Panggit agi gawa enggau raban Polis Hutan lalu sida diasuh nyaga pengelikun mensia mayuh.

Pengujung iya, asil pemintar Tunku Abdul Rahman Putra dia penyarut ke nyadi ba Sarawak mujur chelap baka selama.

Sebengkah pansik dipejalaika betanyaka penemu rayat Sarawak bekaul enggau penumbuh Malaysia kena 19 Februari 1962.

Kena 16 September 1963 dia Malaysia mujur ditumbuh enggau nadai sebarang penangggul sereta diaku Gerempung Penyerakup Bansa (PBB).

INSPEKTOR MENGGONG

Udah nya, kena 1 Mei 1964, Sarjan Menggong ditikika pangkat nyadi Inspektor lalu ngujungka iya gawa nyadi tuai platun Polis Hutan ba Miri.

Maya menua Simanggang siga ketegal konfrontasi dia Inspektor Menggong dianjung gawa ke Simanggang.

Taun 1968, Inspektor Menggong dipindah gawa ke Bukit Siol, Petra Jaya di Kuching nyadi jurulatih ba Palan Pematih Raban Polis Hutan (PPH).

Pangku pengawa nyadi jurulatih chukup ngemantupka ati Menggong laban ulih ngiri penemu enggau pengelandik ngagai raban penyaga pengelikun.

Beduduk ari pengelandik nya mega, Menggong diberi basa ngiring sebengkah 11 raban PPH bejalaika operasyen di sebuah bukit Musi di Bau. Ba operasyen tu raban sida Menggong mujur nimbak lima iku munsuh.

Kena 30 Disember 1972, maya ngiring seksyen bejalaika operasyen ba kandang menua Musi begulai enggau raban platun Rejimen Ke-9 Batalion Askar Melayu Diraja raban sida Menggong semina mujur munuh siku munsuh.

Berekat ari pemanah pengawa sereta pengelandik dia kena 1 Mei 1973, Inspektor Menggong sekali agi ditikika pangkat nyadi Pemangku Penulung Penguasa Polis (PPP) sereta nyadi Pegawa Divisyen Pejilin Garis Entara Menua di Sri Aman.

NGASU KOMUNIS

Tanggungpengawa PPP Menggong anak Panggit maya nya diasuh nangkap tuai komunis ke benama Bong Kee Chok ti chukup chakah nguji merintah Sarawak nengah sebengkah raban dikumbai Paraku (Pergerakan Rakyat Kalimantan Utara).

Pengudah enda mujur nangkap Bong Kee Chok nengah chara bejalaika operasyen di babas begulai enggau soldadu. Dia sida Menggong ngagai pemutus ngena chara ngempang jalai raya.
Asil ari operasyen tu, ba hari keterubah operasyen kena 13 Oktober 1973 sida mujur ngetan Bong Kee Kean iya nya menyadi Bong Kee Chok ti deka ke Kuching ba sebengkah operasyen di stesyen bas Engkilili asil saup siku mata gelap (polis nyaru nyadi orang periman) ari Pampang Khas ke benama Junak.

Kira pukul 4.45 lemai kena 18 Oktober 1973 kerita ditepan Bong Kee Chok mujur ditan raban Pejilin Penyaga Adan Menua di Simpang Temuduk.

Raban Pejilin Penyaga Adan Menua ke mujur nangkap Bong Kee Chok tu iya nya Mulin, Biong enggau Entulu betuaika Koperal Giri enggau dibanti Konstabel Dato.

Sida ngelala nya Bong Kee Chok beratika kelai jari kelingking iya ke udah puntul ketegal kena bom jari kelia. Bong ditangkap besereta enggau sepuchuk pistol ke ngundan seterum diselit ba punggung.

Asil ari pemujur nangkan Bong dia sebengkah aum diatur entara perintah Sarawak, pemesai penyaga pengelikun nyengkaum polis enggau soldadu sereta pengari Paraku.

RUMAH SRI AMAN

Beduduk ari randau nya mega, kena 21 Oktober 1973 sebengkah sempekat pemereti ati (MoU) mujur disain entara Kepala Menteri Datuk Patinggi Haji Abdul Rahman Ya’akub enggau tuai Paraku, Bong Kee Chok di Rumah Sri Aman, Simanggang.

Urung 11 taun komunis bebendar nguji ngalahka Sarawak tang enda mujur. Taja tuai komunis udah alah kena 18 Oktober 1973 tang sekeda ari laluh komunis agi bisi reregap sebelah kampung di Sarawak.

Beduduk ari nya, kena 25 Februari 1997, Menggong diasuh ngiring platun kompeni Charlie Batalion Ke-5 PPH bejalaika operasyen di Sibu.

Ba operasyen nya, sida Menggong betembung enggau 10 iku munsuh lalu betimbak. Bekau ari nya, dua iku munsuh mujur ditimbak. Nyadi nya mih operasyen begulai enggau raban platun ba babas kepenudi dipasuk Menggong.

Kena 1 Julai 1976, Menggong ditikika pangkat baru nyadi Penulung Penguasa Polis. Nya mega pangkat ke pemadu tinggi dipangku Menggong sekumbang nyadi polis nyentuk ke iya pinchin.

BASA ARI AGONG

Ba taun 1978, PPP Menggong anak Panggit nerima bintang ‘Ahli Mangku Negara’ (AMN) ari Seri Paduka Baginda Yang di-Pertuan Agong, Tuanku Yahya Perta di Istana Negara.

Kelimpah ari AMN, midul basa bukai ke kala diterima Menggong berekat ari penyulut enggau pengeransing ngereja pengawa iya nya ‘George Medal’, General Service Medal (Malaya), General Service Medal (Brunei Darussalam) enggau General Service Medal (Borneo).

Sekumbang gawa nyadi raban pengelikun PPP Menggong 56 kali betempur enggau munsuh lalu 41 iku munsuh tumbang kena empa leka senapang iya. Nyadi tu pemujur besai ngelai Menggong endang siku ari bujang berani Iban ti nadai endur manding.

Kena 11 April 1988, PPP Menggong pinchin polis lalu ngentapka pendiau diri begulai enggau sida sebilik ke pemadu disayau ba Taman BDC, Stampin di Kuching.

Taja udah pinchin gawa perintah tang PPP (B) Menggong anak Panggit agi terus gawa nyadi Tuai Pegawai Pengelikun ba sebuah serikat di Kuching ketegal ti agi regas enggau gawa dikena nambahka penatai pemisi dikena nupi sida sebilik (Johari : 1997).