“Tanggungpengawa kitai endang ungkup semua komuniti, ungkup bumiputera enggau ukai bumiputera.”
MARUDI: Kitai enggai bisi ‘sampuk’ dalam Gabungan Parti Sarawak(GPS), pia ku Kepala Menteri Datuk Patinggi (Dr) Abang Haji Johari Tun Openg.
Iya madah nyema bisi ulah ke baka nya dalam GPS, iya ulih nganchurka gempung parti nya.
Nyema gempung tu anchur, reti nya kitai (GPS) pan abis, ku iya maya bejaku bejadika projek Waterfront Marudi bepalan ba Laman Marudi, ditu.
Kenu ku iya, ketuai GPS mega enda belembut ngagai sebarang orang ke rindu ngajum kaban gempung tu seraya nyemetak madah tuju pengawa meseti bepelasarka prinsip enggau ngemeratka Sarawak serera peneka rayat.
“Tanggungpengawa kitai endang ungkup semua komuniti, ungkup bumiputera enggau ukai bumiputera.
Nya alai, kitai deka genap kaban gempung parti nya angkun sereta ngemeratka tanggungpengawa lebih agi nagih hak Sarawak ke udah lenyau dalam Konstitusyen Malaysia 1963.
Tanggungpengawa kitai dalam GPS iya nya ‘Sarawak First'(Kemeratka Sarawak), ku iya seraya madah Sarawak semina ulih dikemujur enggau dikemansangka anak Sarawak empu.
Nya alai, nama kebuah kitai numbuhka GPS lalu tu mega nyadi pelasar kitai nyingkang ke mua ke pemaik rayat, ku tandu iya.
Projek Waterfront Marudi beungkus RM23 juta terubah iya, projek ke dikemendar dibaruh iring Perintah Besai sebedau tu.
Tang, pejalai projek tu diketu Perintah Pakatan Harapan sebedau iya diambi lalu dibayar Perintah Sarawak.
