KUCHING: Klinik Pengerai Ba’kelalan ti baru dikemendar nengah agih belanja RM14.8 juta disadang tembu ba suku keempat taun 2028.
Sapit Menteri Pengerai Mensia Mayuh, Pengawa Berumah enggau Perintah Lokal lI, Datuk Michael Tiang Ming Tee madahka pengawa bejalaika projek nya diatu benung nengah proses tinda.
Pekara nya dipadahka iya leuh nyaut tanya ari Kaban Kunsil Nengeri (ADUN) Ba’kelalan, Baru Bian, bekaul enggau pejalai pengawa ngemanahka Klinik Pengerai Ba’kelalan enggau Klinik Pengerai Long Semadoh di baruh Projek Klinik Repuk ba Aum Kedua Penggal Kelima Kunsil Nengeri (DUN) Sarawak ba Kompleks DUN, ditu, tadi.
Ku iya, pengawa ngemanahka dua buah klinik pengerai nya tembu dalam taun 2024 ke alai, Klinik Pengerai Ba’kelalan nerima agih belanja penyampau RM450,000 enggau Klinik Pengerai Long Semadoh nerima agih belanja penyampau RM300,000.
“Projek ngemanahka infrastruktur bekal kuasa karan ba Klinik Pengerai Long Semadoh, Lawas ti mungkur pengawa masang sistem kuasa solar udah dikemandar nengah agih belanja RM4 juta.
“Projek tu berengkah digaga kena 19 Julai 2026 lalu dipelaba tembu ba suku ketiga taun 2027.
“Klinik Pengerai Ba’kelalan enggau Klinik Pengerai Long Semadoh deka nyendiaka servis nerima pesakit luar, pengerai indai enggau anak mit, farmasi enggau penusah ngenyit,” ku iya.
Iya madah baru, Sepital Lawas nyadi palan berubat ti pemadu semak ngagai kededua klinik nya iya nya urung 150 kilometer ari Klinik Pengerai Ba’kelalan enggau 105 kilometer ari Klinik Pengerai Long Semadoh.
Ku iya, pengawa ngaga klinik baru di Ba’kelalan enggau pengawa ngemanahka bekal kuasa karan di Long Semadoh dikearapka ulih nyukung pengawa nyendiaka perengkaguna pengerai di kandang menua nya enggau meruan.
