KUCHING: Pengawa numbuh komiti khas mutar isu legasi pemansang ba palan pengentap baru Bakun, kelebih agi ngaul rayat di BRS Sungai Asap enggau hak tanah adat meseti dirumban nentuka pengawa mutar nemban.
Kaban Kunsil Nengeri (ADUN) Murum, Kennedy Chukpai Ugon madah, komiti nya beguna amat dikena berati ke bemacham isu ti agi nyadi sereta ngiga chara mutar ti asi ke pemaik komuniti bekaul.
Ku iya, buah penemu bekaul langgur numbuhka komiti khas nya udah dibantai Premier Sarawak, Datuk Patinggi Tan Sri Abang Johari Tun Openg lebuh betemu enggau pengari komuniti kena 25 Februari 2026.
“Taja pia, naka diatu komiti nya apin ditumbuh taja pen aum bukai udah diatur.
“Nya kebuah, aku minta pengawa numbuhka komiti khas tu ulih dirumban nengah kerejasama opis menteri, ejensi bekaul enggau pengari komuniti,” terang iya.
Chukpai madah munyi nya lebuh bejuraika Rang Undang-Undang Belanja Tambah (2027), 2026 lebuh Aum Kedua Penggal Kelima Kunsil Nengeri (DUN) Sarawak ba Kompleks DUN, ditu tadi.
