KUCHING: Komuniti Kristian di Sarawak dilalau terus meri sukung penuh ngagai iring tuai Premier Sarawak Datuk Patinggi Tan Sri Abang Johari Tun Openg, ti nyadi tuai ngagai semua rayat pupu bansa enggau pengarap di nengeri tu, seraya ngiring Sarawak nyadi wilayah maju, beserakup sereta lantang.
Sapit Premier Sarawak, Datuk Amar Douglas Uggah Embas nyemetak madahka, pemujur iring tuai Abang Johari negutka penyerakup rayat ti ngemudahka perintah mai pemansang bepelasarka Strategi Pemansang Pasca COVID-19 (PCDS) 2030.
“Abang Johari iya nya tuai semua raban bansa nyerakup rayat ngambika pemaik di Sarawak seruran tegap.
“Nya alai, aku minta semua komuniti Kristian di Sarawak nyukung Premier dikena nentuka iya ulih ngemujurka agenda penyeleda pemansang ungkup Sarawak senutuk enggau visyen PCDS 2030,” ku iya madah nengah Pesan Khas Pengerami Krismas 2025 enggau Taun Baru 2026 ba ditu, kemari.
Uggah nerangka, PCDS 2030 udah netapka kuing tuju nengeri nuju pengelantang ekonomi, sengkaum rama, sereta pemeruan rampa menua, sereta mekuhka pemansang ti bisi daya tan ngambi ke nadai siku rayat dikelaung ari nerima buah pemansang.
“Enti kitai meda Bajet Sarawak 2026 ti dibantaika Abang Johari kena 24 November taun tu tadi, nya mandangka komitmen perintah nengeri deka negapka pengelantang pengidup rayat sereta nentuka pemaik ulih dikunsi sechara sebela, nyerangkung perayat ke mendam di kandang menua pesisir.
“Agih pemansang penyampau RM9.3 bilion dalam Bajet 2026, enggau RM6.1 bilion tauka 66 peratus diungkupka ngagai pemansang menua pesisir ngayanka perintah terus meri perati deka ngerapitka seraka entara mengeri enggau menua pesisir sereta nambahka pengelantang komuniti di menua ulu,” terang iya.
Dalam pesan nya mega, Iya bisi nyebut senentang perintah nengeri deka terus nyukung institusyen pengarap nengah agih RM120 juta ngagai Unit Pekara Pengarap Bukai (UNIFOR) taun 2026, kelimpah meri tumpu ngagai pelajar, pemansang bakat sereta inisiatif mutarka kos pengidup. — TVS
