INDUN SILONG
Suarasarawak.news@gmail.com
KOTA SAMARAHAN: Bagi menua Kota Samarahan deka nyadi baka ‘tekang intan’ laban deka nyadi palan metropolis pengerai enggau pelajar.
Sapit Premier Sarawak, Datuk Amar Dr. Sim Kui Hian madah, pekara nya deka nyadi pengelebih ngagai Kota Samarahan laban deka ngembuan kaban kaunsil ti bepenemu enggau bepenau.
“Bagi menua tu deka nyadi palan institusyen standard pelajar taja pen bepalan di menua pesisir.
“Reti ti ku aku tu, kitai bisi mayuh palan berubat enggau pelajar baka Palan Tungkul Atau Sarawak, Palan Penyakit Berampit Sarawak, Universiti Malaysia Sarawak (UNIMAS), Universiti Teknologi MARA (UiTM) enggau ti bukai,” ku iya.
Dr. Sim bejaku munyi nya rambau ngemata Program Angkat Sumpah Kaban Kaunsil Mengeri Kota Samarahan (MPKS) di Balai Gerempung Peladang Nengeri Sarawak ditu, tadi.
Ku iya, berindik ari bagi menua nya ti majak mansang ba sukut pengerai enggau pelajar, Kota Samarahan ulih ngerembai nyadi siti palan metropolis pengerai enggau pelajar ti tebilang.
“Tu deka ngerembai ekosistem, servis, pengerai, pansik enggau kuasa dudi hari.
“Pengawa tu ulih dirandang laban bagi menua tu ngembuan mayuh raban nembiak ti ngembuan master enggau PhD.
“Sida ti deka nampung kuasa pengereja pengawa sereta servis kitai jemah ila nyengkaum industri,” ku iya.
