KUCHING: Sepenyampau RM1.09 bilion tauka 54 peratus ari semua projek berega RM2.02 bilion ti dipelanja Perintah Sarawak udah dilempai ngagai kunteriktor bumiputera naka suku keterubah taun tu.
Ku Sapit Premier Sarawak ti mega Menteri Pekara Wang enggau Ekonomi Baru Kedua, Datuk Amar Douglas Uggah Embas, inisiatif nya nyeremin pengeransing Perintah Gempung Parti Sarawak (GPS) dikena nyukung kunteriktor Bumiputera ngambi sida bepenau enggau ulih besemekih.
“Program latih enggau pemansang ungkup kunteriktor sereta pemekal Bumiputera ti nyerangkung kus bekaul pengelandik, generik enggau online deka terus dipejalai ngambi tetangkupka peminta industri.
“Sepanjai taun 2024, bisi 110 kus udah diatur ti meri pemaik ngagai 4,730 penyereta seraya nyentuk suku keterubah taun tu, bisi 17 program latih udah dipejalai mungkur 1,626 penyereta,” ku Uggah lebuh nyimpul jurai opis menteri iya ba Aum Kunsil Nengeri (DUN) Sarawak, ditu tadi.
Nambah ke nya, Uggah madah, perintah udah berati ke baru polisi enggau atur ungkup kereja, bekal enggau servis ti dipelanja perintah dikena nambahka penyikar sereta pengasi bejalaika projek.
