ENGKA bedau tentu mayuh orang ngelala penanyi bajik ti ngempu nama Alana Ajon tauka tampak agi dikelala Alana Jay.

Kati ke enda laban iya siku penanyi ti agi baru bendar ba dunya pemerindang Dayak lalu iya berengkah ngaul diri ba pengawa tu kenyau ari taun 2022.

Kala Meda Aku Nyabak, lagu single keterubah iya ti ngepunka pejalai iya nyadi siku artis Iban ti bela ngerichahka agi industri muzik kitai.

LAGU BARU
Enda lama da, penanyi beumur 38 taun nya deka ngeluarka lagu single pemadu baru ari iya ti pejuluk Beretan.

Lagu berentak balada nya deka negapka agi penuduk enggau pejalai iya ba industri muzik Dayak.

Pia mega, nya ngelaika iya deka seruran chakah ngeluarka lagu diri empu dudi hari dikena merindang bala peninga kelimpah ngerichahka agi industri muzik lokal.

Nya endang nipak ke juluk iya ti deka terus merindang sereta ngeluarka lagu enggau ngetanka identiti diri empu.

Ba pengawa merindang, penanyi tebilang menua, Datuk Seri Siti Nurhaliza Tarudin nyadi inspirasyen Alana Jay.

“Siti Nurhaliza siku ari artis ti meri inspirasyen ngagai aku mekuh pengawa merindang tu laban iya ngemerat disiplin, kemerah, baruh ati sereta semampai konsisten.

“Iya ukai semina konsiten ngeluarka lagu enggau merindang bala peninga iya tang vokal tauka petah nyawa iya semampai konsisten ari suba nyentuk sehari tu.

“Nya alai, iya mujur meri inspirasyen ngagai aku nunda singkang iya ba pengawa tu,” terang Alana Jay seraya tuchum manis ngundan pengasai temegah.

KUASA PENGERINDU
‘…penyayau aku ke nuan, arap datai ba adan, pengerindu aku meruan, arap ke enda puntan…’.

Baka nya ku sekeda genteran lagu Beretan ti ngenang pasal pemesai pengerindu enggau penyayau siku indu ngagai siku bujang ti mujur enchuri ati iya.

Alana Jay madah, lagu nya ngundan pesan pengerindu ti chukup besai enggau dalam ngagai siku orang.

Ku iya, lebuh kitai ningaka lagu nya, dia kitai ulih ngasaika getar tegu emosyen enggau aura kuasa pengerindu ba genap genteran lagu.

“Tu nyimpan reti sereta penyelai pengerindu enggau pengelengau ti chukup dalam entara dua ati ti benung nanggam pengerindu.

“Pengerindu! Nadai utai ti besai agi ari pengerindu di dunya tu lalu kuasa pengerindu ulih ngalahka semua utai.

“Pengerindu mega meri kitai pengering dikena beretan napi ngelumbang penguji ti enda ngetu mangka ngempas ke pantai kaul tuchi.

“Nya alai, ketegal pengerindu enggau penyayau, dia siku orang sanggup milih jalai beretan taja napi bemacham penguji ti bangat kepapas,” terang pedagang krafjari nya.

Tampung iya, lebuh nyadaka lagu nya, ati iya berasai amai ditegu laban lagu nya ngundan emosyen ti dalam.

MINAT BELAGU
Baka orang bukai, pengerindu belagu ti dikembuan Alana Jay endang dikembuan iya kenyau ari mit lalu nya kebuah iya suah masuk bemacham pekit belagu kelebih agi ti diatur raban sekula.

Nipak ke umur iya ti majak mansang besai tuai, pengerindu iya ba pengawa belagu pen majak besai kelebih agi pengudah begelar artis.

Tusui anak tuai ari empat iku diri menyadi nya, iya berengkah ngaul diri ba pengawa merindang kenyau ari taun 2022.

Pejalai iya ba industri muzik Dayak bepun lebuh iya diberi peluang ngeluarka lagu pejuluk Kala Meda Aku Nyabak ba baruh perabung Serikat Aka Dambai Production (ADP).

Nya mih lagu single keterubah iya lalu diatu iya benung ngeluarka lagu pemadu baru diri ti pejuluk Beretan enda lama da.

Nya alai, ngarapka bala peninga iya liat ati nganti lagu baru ari artis ti dikerindu ke kita tu lalu terus meri sukung tegut ngagai iya.

BEMACHAM KENANG
Lebuh bekunsi ke kenang manis iya, Alana Jay ti rindu ke chura biru enggau makai lauk rumah panjai madah, iya kala dilempai pengandal nyadi akim Pekit Idol Nembiak serimbai Pengerami Benak ba taun tu tadi.

Iya madah, nya siti basa dikena ngaku iya kelimpah ulih belajar mayuh pekara enggau peneleba bekaul pengawa belagu.

Tampung iya, bediri ba atas panggau nunga mensia mayuh sambil merindang, nya siti kenang manis enggau berega.

Taja pia, iya ngaku, bediri ba atas panggau seraya nunga enggau merindang mensia mayuh ukai pekara ti muntang.

Iya madah, udah tentu nya begunaka pengepuh, pengandal ti besai, pemintar mai diri enggau penemu nguasa panggau.

“Lebuh bediri ba tengah-tengah panggau, dia semua mata deka dituju ngagai kitai lalu bemacham peragam bemain ba runding sida.

“Mimit kitai ilap lebuh merindang ba atas panggau, semua mata nya deka meda kelebih agi diatu jeman viral.

“Nya alai, kitai enda tau enda bejimat kelimpah pintar mai diri enggau ngelalaika pengasai kesal sereta landik nguasa panggau,” ku iya.

Lebuh kitai majak dikelala mensia mayuh, ku Alana Jay, ba mayuh orang ti rindu ke kitai tentu bisi sekeda orang enggai meda sereta nguji deka ngelabuhka kitai.

Terang iya, bemacham jaku pejah ti enda nyamai didinga pending ari sida ti deka nguji ngelabuhka kitai.

“Tang kitai patut pintar nisih pekara nya, ambi ke chiru lalu buai ti keruh.

“Anang kelalu ngemanaka jaku pejah orang tang belajar mih ari nya dikena ngemanahka diri empu, jaga disiplin lalu anang terunda-runda,” ku iya nyemetak.

MAJAK MANSANG
Industri muzik Dayak kemaya hari, ku artis asal Sri Aman nya madah, majak ngerembai, mansang ke mua enggau dikerindu ke mensia mayuh.

Iya madah, lagu Iban ukai semina dikerindu ke semua orang di selampur Sarawak aja tang bansa bukai di luar nengeri betuah tu.

“Diatu mayuh artis luar nguji ngeluarka lagu Iban kelimpah majak diaku semua orang.

“Pia mega, lagu Iban majak bekualiti sereta napi inovasyen besai ba mayuh sukut nyentuk suah trending lumur satu di YouTube enggau dipeda ba penyuah manggai bejuta kali.

“Tu siti pengerembai positif enggau signifikan ngagai dunya pemerindang kitai lalu aku ngarap pekara tu terus nyaguka nama industri muzik kitai ngagai tikas ti tinggi agi setipak enggau industri muzik menua luar,” ku iya.

Sebedau ngujungka randau, Alana Jay meri terima kasih ngagai semua orang ti semampai ba tisi meri sukung tegut ngagai iya kenyau ari suba nyentuk diatu.

“Terima kasih ngagai semua kita kelebih agi bala peminat, bakih, bakih sama industri, kaban belayan enggau kami sebilik ti semampai nyukung sereta besampika pejalai aku ba pengawa tu.

“Aku chukup betuah laban kita semampai bisi ba tisi nyukung aku. Enti nadai kita, sapa mih aku?

“Terus ke sukung enggau sampi kita ngagai aku ngambi aku ransing agi ngeluarka mayuh lagu baru dudi hari dikena merindang semua sereta ngerichahka agi industri muzik kitai,” ku Alana Jay netak randau.