MUKAH: Jalai Tingkas Sebakong penyauh 1.5 kilometer ari jalai besai ditu kemari nadai ulih tengah sebarang kereban pengangkut ketegal ampuh bah.
Kenu ku Ketuai APM Pelilih Mukah Kapten (PA) Zuriza Sharkawi, penusah ampuh bah nya dipelaba laban ai pasang ke nyadi ba sitak nya.
“Taja pia, palan nya agi selamat lalu sida di menua nya dilalau bejimat laban nangika ai majak bah,” ku iya maya dirandau kemari.
Kelimpah ari nya, Zuriza madah Rumah Ajah Sebakong mega bisi kena bah kira semeter penalam.
“Penanggul sistem parit enggau ai pasang ngujungka penyadi ampuh bah nya, agi nadai palan pengenduh sementara dibuka,” ku iya.
Udah nya, naka tengah hari kemari, sekeda sitak ba Pelilih Matu mega bisi kena ampuh bah.
Pegawai Penyaga Orang Periman Pelilih Matu Lt (PA) Jumaat Akasas madah lima sitak ke kena ampuh bah nya iya nya Kampung Bertong, Kampung Jemoreng, Kampung Sekaan Kechil, Kampung Sekaan Besar nyengkaum Pasar Matu,” ku iya.
Pengudah diperesa kira ngalih hari kemari beratika mayuh jalai besai agi ampuh bah.
Bepelasarka ripot gaya hari ari Opis Pengemata Gaya Hari Malaysia (MetMalaysia), ujan bangat dipelaba terus nyadi ba zon tengah enggau utara Sarawak nyentuk sehari tu mungkur menua Sri Aman, Betong, Sarikei, Sibu, Mukah, Kapit (Song) enggau Bintulu (Tatau).
