MUKAH: Bagi Menua Mukah deka nurai sejarah baru ba sektor pengangkut langit lebuh nerima penatai terubah bilun AirBorneo kena 2 Januari 2026 ti deka seretai sangkai ba dua endur iya nya Padang Bilun Mukah enggau Padang Bilun Tanjung Manis.
Penatai bilun nya disadang nyadi penyungkak rentayan penerebai domestik kelebih agi di kandang menua tebing tasik tengah Sarawak.
Pekara nya dipadah Residen Bagi Menua Mukah, Datuk Kueh Lei Poh lebuh ngetuaika Aum Besikap Penatai Terubah Bilun AirBorneo ti udah diatur ba Palan Opis Perintah Sarawak Bagi Menua Mukah kena Hari Dua.
Sama datai, Kaban Kunsil Nengeri (ADUN) Balingian, Abdul Yakub Arbi serta ketua-ketua jabatan Bahagian Mukah.
Ku aum nya, penerebai terubah AirBorneo ba haribulan nya deka ngena dua bansa bilun enggau taga jam sangkai ti bebida.
Ba Padang Bilun Mukah, bilun ATR 72 ditaga bekejang ari Padang Bilun Antarabansa Kuching pukul 8.25 pagi lalu datai pukul 9.20 pagi.
Seraya ba Padang Bilun Tanjung Manis, bilun De Havilland DHC-6 Twin Otter ditaga bekejang ari Padang Bilun Antarabansa Kuching urung pukul 8.45 pagi lalu sangkai pukul 9.25 pagi.
Dikena ngerami penatai bilun terubah nya, deka diatur siti pengawa rasmi ba kededua padang bilun nya ngena simbolik ‘water salute’. – EDISI UKAS
