LAWAS: Projek Ngaga Loji Meresi Ai Trusan deka nambahka kapasiti bekal ai lalu nangkup peminta peranak sereta pemansang menua nya dudi hari.
Sapit Premier Sarawak, Datuk Amar Awang Tengah Ali Hasan madah, loji baru ngembuan kapasiti 50 juta liter sehari (MLD) ti diperambu nya deka nyadi pemutar timpuh panjai negap sistem bekal ai di Trusan enggau menua semak nya.
Ku iya, pengawa ngambi ai mata ungkup projek nya patut diberi perati nentuka pemansut ai ti dipilih ulih nyamin operasyen loji belama sereta berunding ke ubah ti nyadi ba sungai dia.
“Taja tungkap tumu udah digaga, tang kitai patut berati ke baru endur ngambi ai mata ngambi penanggul sebaka enda betandu dudi hari,” ku iya nyemetak.
Awang Tengah nyebut pekara nya lebuh ngatur pejalai gawa ke Loji Meresi Ai Kandang Menua Trusan, ditu ensanus. Iya mega madah, perintah diatu ngerumban pengawa dikena mutar penanggul bekaul sistem ngambi ai mata ke bisi diatu, nyengkaum kereja ngintu enggau mitigasi sementara sebedau pemutar timpuh panjai dipejalai. ”
Semua pengawa bekaul patut dirumban nentuka bekal ai ngagai peranak tejamin kelimpah nentuka pemansang infrastruktur ai dipejalai lanchar enggau nemban,” terang iya.
Projek Ngaga Loji Meresi Ai Trusan nyadi entara inisiatif seruran dipejalaika Perintah Sarawak ba pengawa namah perengkaguna pemun kelebih agi sistem bekal ai, dikena nyukung ekonomi tumbuh enggau nambah pengelantang rayat.
Pengudah tembu ila, projek nya disadang meri pemaik ngagai peranak Trusan enggau menua semak diaari nambah kapasiti ai beresi ti dikeluar enggau nyendiaka sistem bekal ai ti meruan agi sereta ulih beretan.
Sama datai, Sapit Menteri Utiliti enggau Telekomunikasyen, Datuk Liwan Lagang; Kaban Parlimen Lawas, Datuk Henry Sum Agong; Residen Bagi Menua Limbang, Unus Tambi; Direktor Kandang Menua Ejensi Pemansang Kandang Menua Utara (NRDA), DatukUbaidillah Abdul Latip; Sapit Direktor Pemansang JBALB, Tamida Da’adi enggau Sekretari Politik Premier Sarawak, Awangku Jinal Abedin Datuk Pengiran. – EDISI UKAS
