BEKENU: Nembiak Sekula Primari (SK) Manong diberi latih napi penusah angus ari Balai Bomba enggau Penyah Penusah (BBP) Batu Niah.
Tuai BBP Batu Niah, Rary Benjie madah, tuju bejalaika latih nya dikena ngamat peminta ari raban sekula nya empu.
Dulu agi ari nya, ku iya, sida bisi dikangauka raban ari sekula nya meri latih penusah angus ngagai nembiak sekula dia.
“Pengawa meri latih tu beguna amat dikena narak penyedar enggau meri peneleba ngagai bala nembiak ba sekula tu napi penusah angus.
“Nengah latih tu, bala nembiak ulih nyelematka diri empu enggau ngelala pengawa ti patut dikereja sida nyema bisi nyadi penusah angus pagila lusa,” ku iya ba sebengkah penerang tadi.
Iya madah, entara aktiviti ti bisi digaga sida maya bejalaika latih nya baka meri latih nyelamatka diri empu ngena chara ti nemban nyema bisi penusah angus enggau licha ari raban bomba.
Program ti berengkah diatur pukul 11.07 malam kemari nya, ku iya, nerima timbal manah ari 15 pengajar enggau 34 nembiak sekula nya.
