MIRI: Dagang kereban tauka keresa ngepan ulih disungkak, diangkat enggau dikelaku nengah pekit bengepan.

Kaban Kelab Ngepan Betong (KNB), Rintai Edmond madah, ba Simposium Ngepan Iban (SNI) Tikas Nengeri Sarawak 2022 diatur ditu ujung minggu nyin tadi, pekit bengepan bisi berubah mimit ari semua pekit ti kala diatur sebedau tu.

Ku iya, pekit bengepan ba simposium ti keterubah diatur ba luar Bagi Menua Betong serak tu udah dibagi ngagai tiga kategori.

“Siti kategori, pekit ungkup lelaki berebutka gelar Keling, sebagi pekit berebutka gelar Kumang ungkup sida ke indu dara lalu sebagi da berebutka gelar Ratu Ngepan Kontemporari.

“Nyadi ba pekit berebutka gelar Keling enggau Kumang, bala pemekit bekenaka ngepan nitihka pilih diri, chunto baka ngepan ari Skrang, Batang Ai.

“Lalu ba pekit berebutka gelar Ratu Ngepan Kontemporari, bala pemekit bekenaka ngepan begulai.

Reti nya, ngepan asal dipegulai ngena ngepan moden.

“Asil ari pekit tiga kategori tu, kitai tau bulih penemu ba pengawa bengepan, chunto, kitai ukai semina nemu ngepan asal ari pelilih menua diri tang mega nemu ngepan ari pelilih menua bukai.

“Ba pekit ngepan kontemporari, kitai ulih ngemansang, ngemajuka sekeda kereban ngepan nyadika siti ngepan ti ulih dikena besehari sehari.

Chunto baka lampit, dekoh, tumpa enggau ke bukai.

“Ari nya tadi, iya ulih nyungkak enggau ngangkatka dagang bala ti bejual kereban tauka keresa ngepan lalu tu ulih mai ekonomi bansa Iban maju,” terang iya lebuh dirandau Suara Sarawak.

Nya alai ku Rintai, SNI ke dudi ila patut digulu bala nembiak Iban ti agi besekula, bala pengemeran seni ngepan, bala orang ti bejualka ngepan nyengkaum sida ti begagaka kereban ngepan.

Kebuah pia ku iya, awakka sida nemu ni bagi ngepan ti patut dikemansang, diangkat enggau dikena bansa Iban, ukai betiruka ngepan bansa bukai.

“Bansa kitai udah dikelala ba penyelai enggau pengelain kereban ngepan, nadai kebuah kitai deka niru ngepan bansa bukai, enggi diri empu umbas diadu.

“Orang bukai nyengkaum sida ari menua ribai chukup rinduka keresa tauka kereban ngepan asal Iban, tu meh peluang ti patut dikena kitai nyungkak dagang enggau ekonomi bansa diri.

“Lalu pengawa kitai tu endang nipakka rambai jaku SNI 2022 iya nya Ngepan Pesaka Bansa, Nyungkak Pemansang Ekonomi Bansa Iban,” ku iya.

Nambahka nya ku Rintai, pengawa SNI nya patut ditampung, dikemesaika agi ari ke udah lalu patut diatur nyelinting taun, tauka pengawa ninting taun.

Ku penemu iya, enti SNI suah diatur, dia rita pengawa nya deka jauh agi ngerembai lalu nyadi siti ari chara dikena matak rebak baru angkunka ngepan asal.

“Baka reti pengawa ngintu Gawai Dayak, ti diatur nyelinting taun, lalu semua orang nemu magang berita nya pengudah hari besai bansa Dayak nya diaku enggau digazet.

“Utai baka tu ti dikedeka kitai, ngambika SNI tu ulih diangkat nyadi siti pengawa ti mandangka pengaya enggau pesaka bansa lalu diaku perintah menua dudi hari.

“Rebak baru mega deka ngelala, nemu reti enggau lebas chara bengepan kelimpah nerenak ulah ti ngemegahka ngepan asal ditampung ari aki ini sida,” ku iya nyemetak.

Ngenang chara ti manah dikena ngintu enggau ngetanka ngepan asal ari pisin (fesyen) moden ku Rintai, kitai ngatur pekit bengepan asal ba tiap kali SNI diatur.

Nambahka nya ku iya, pengawa mandangka kereban ngepan asal mega patut bisi ninting SNI diatur, awakka orang nemu bagi ngepan ke tulin asal enggau kontemporari.

“Tu nipakka tuju ngatur SNI ti nyadi pelasar bejuraika pemansang ngepan sereta ngetanka pesaka asal bansa Iban nya seraya ngerembaika iya ngagai tikas ti tinggi agi.

“Tuju kedua dikena mandangka Ngepan Iban ngambika dikelala raban nembiak rebak baru enggau bansa bukai lalu ulih diangkatka nyadi siti ari tanda pesaka bansa kitai Iban.

“Lalu kepenudi, ngambi nyadi pelasar dikena kitai mandangka pemanah kostum kontemporari ti digaga bechuanka ngepan asal Iban lalu diangkat nyadi sebengkah pisin jeman diatu,” ku iya ngeraup kenang.