LIMBANG: Dua peranak menua Brunei selamat ari sebarang penusah bebadi pengudah kerita ditepan seduai ensayar sebedau labuh ke dalam parit ba Jalai Kampung Limpasong, ditu tadi.
Sapit Pemangku Direktor Opis Bomba enggau Penyah Penusah Nengeri Tiong Ling Hii madahka penusah nyadi urung pukul 3.02 lemai ngaul sebuah entukar bansa Toyota Fortuner ngena lumur flat menua Brunei.
Ku Ling Hii, taja Muhammad Azim Mustaqiim Ahmad enggau Nurul Amal Afifah Ahmad nadai bakal tang entukar seduai balat rusak.
“Lebuh datai dia, kami tepedaka sebuah kerita Toyota ari menua Brunei Darussalam udah ensayar lalu labuh ke dalam parit jalai nya.
“Taja pia, nadai orang tepekul dalam entukar pengudah ulih ngemansutka diri ari entukar nya,” ku iya nerang, ditu tadi
Entukar seduai nya ensayar ketegal jalai ke enda sebela umba jalai lichin ketegal hari ujan.
Raban bomba begunaka awak urung 15 mit bejalai operasyen lalu sida mulaika diri ke opis pukul 3.45 lemai.
