SIBU: Parti Demokratik Progresif (PDP) nandu baru penetap penemu deka ngetanka semua penuduk ti dipegai parti nya diatu bepelasarka prinsip ‘maruah’, penuduk ti disandang ke pemaik rayat.
Presiden PDP, Datuk Seri Tiong King Sing madah, penetap penemu parti nya tegap, kelebih agi ngetanka mandat rayat ti diberi ngagai raban tuai ti dipilih. “Kami teguh ba penetap ati kami.
Kami mega enda belembut ba pekara ti ngaul ‘maruah’ parti kelebih agi ti ngaul pemaik rayat.
“Kitai enda ngemendarka sebarang raban luar ‘malut diri’ ba pekara PDP,” ku iya. Tiong bejaku munyi nya ba jaku pengelalu Aum Besai Tiga Taun Sekali PDP 2026 (TGA PDP 2026), ti dipenyadika Premier Sarawak, Datuk Patinggi Tan Sri Abang Johari Tun Openg ba siti hotel ditu, kemari.
Ku iya, penuduk PDP dalam Gempung Parti Sarawak (GPS) meseti dipebasa ba landskap politik nengeri tu, lalu madah ke parti nya mega meseti bejalaika tanggungpengawa ti manah dikena nyaga pemaik Sarawak.
Iya madah baru, PDP diatu bisi urung 250,000 iku kaban nyengkaum kaban ti nyemilik ari pengawa begempung enggau Parti Sarawak Bersatu (PSB) ba taun 2024.
“Tu ukai semina penyampau PDP kenyau ari taun 2002 sebedau dibali baru nama ba taun 2017 nyengkaum ngerembaika parti ngagai Semenanjung Malaysia nengah pampang protem bala anak Sarawak ti diau din mega tegap. Iya mega ngaku sukung tegut ngagai GPS enggau Premier Sarawak, seraya nyemetak madahka penyerakup ba gempung meseti bepelasarka pengelurus enggau bebasaka pangan diri.
“Penyerakup nyadi penegap kitai, tang iya enda tau enda datai enggau pengelurus.
“Kitai enggai nyadi pemerati aja dalam gempung tang kitai deka nyadi orang ti enggau ngaga pemutus,” ku iya. Ku Tiong, kerejasama dalam GPS meseti diembing nengah konsensus tubuh aja.
Nya ngayanka penegap enggau pengandal rayat ba pekara ti ditegika kami,” ku iya.
Tiong mega madah, penumbuh sereta basa entara parti komponen lalu ngelalau bala kaban parti ngambika seruran baruh ati, ngadu pengawa sereta fokus lebuh meri servis ngagai rayat taja megai pangku pengawa besai.
Tiong madah ke TGA 2026 tau dikumbai baka ‘pengada baru’ parti ti ngembuan tuju ngenegapka penyerakup enggau strategi ke mua.
“PDP seruran ingatka pun penatai diri lalu enda tepawah runding ketegal kuasa.
“Nya alai, kitai patut bebendar meri empas ti manah ngagai GPS sereta nyapai pemujur pengawa bepilih begulai,” ku iya.
Iya nangkan nya, ngelalau bala kaban PDP ngambi seruran beserakup sereta meri perati lebuh parti besikap diri napi pengawa bepilih nengeri ti deka datai nengah pengawa gawa ke rayat, tegap sereta ngembuan integriti belama.
