KUCHING: Pemansang industri baka semikonduktor, betanam betupi teknologi moden sereta minyak enggau gas disadang ulih numbuh mayuh agi peluang ungkup graduet Sarawak gawa di nengeri diri empu.

Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengeransing perintah ngagih mayuh belanja ba bidang pelajar patut ditangkan enggau peluang kereja ungkup peranak Sarawak nyaup pengerembai ekonomi nengeri.

“Seriris enggau pemansang industri, graduet Sarawak deka mayuh agi peluang kereja ti bela deka nyaup pemansang ekonomi nengeri lalu enda ibuh gawa di menua bukai,” ku iya madah.

Iya madah munyi nya maya ngenataika jaku simpul ba Aum Kunsil Nengeri (DUN) Sarawak Ke-19 ditu, Hari Tiga.

Ku iya, pekara nya ulih dipeda maya peranak Sarawak ke bepenemu sereta bepeneleba pulai gawa enggau kompeni bekaul perintah (GLC) nengeri baka Sarawak Petchem ti meri gaji ke manah.

Ambika banding ku iya, baka Manijer Pengatur Enggau Sarawak Petchem, Siti Aisyah Mohd Zaman, sebedau tu gawa bekaul prinsip rampa menua, rama enggau pengatur (ESG) ngadu pemansang betanam betupi menua sereta betuaika program agroteknologi beungkus RM200 juta di Agrobank.

Kelimpah ari nya, Manijer Injiniring enggau Teknologi Sarawak Petchem, Abang Noor Akmal Yahya Abang Rosli, ngembuan peneleba gawa lebih 25 taun ba industri ngaga petrokimia enggau kimia ba enam buah menua nyengkaum United Kingdom, Belgium, Belanda, Jerman, China enggau Malaysia.

Siku agi peranak Sarawak, Aldrin Glenn Roland ke gawa ba Sarawak Petchem bela pulai gawa ngagai nengeri tu sepengudah tembu ngulu latih industri ba Jerman kelimpah bela kala gawa di Semenanjung Malaysia.

Premier Sarawak madah, peneleba ke dikembuan sida sebagi ari chunto pengelandik ke dikembuan peranak Sarawak ti mutus pulai gawa di nengeri tu. — EDISI UKAS