Peminta rayat di DUN Saribas diperati perintah

Perintah GPS ngemeratka pemansang ke diguna baka ngemujur projek SPK

SPAOH: Perintah Sarawak ngena agih RM8.4 Juta ngemujurka Projek Skim Nangkir Genturung Pendiau (SPK) ba sitak Saribas nyengkaum Kampung Mangut enggau Kampung Bungin dalam timpuh dua taunt u.

Projek SPK Mangut tu ngna RM5.5 Juta lalu fasa keterubah dikena ngaga 40 lot ari kesemua 178 lot.

Pengawa tu dikemujur Ah Li Contractor Sdn.Bhd kena ka 5 April (Jumaat) lalu diperambu tembu dalam timpuh 18 bulan iya nya Oktober 2020.

Langgur projek tu nyengkaum nimbuk tanah, ngaga parit besimen enggau ngetar jalai.

Kaban Kaunsil Nengeri (ADUN) Saribas Mohammad Razi Sitam madah, sitak DUN Saribas cukup benasit laban nerima perati perintah Gabungan Parti Sarawak (GPS) dikena nampung guna peranak genturung pendiau ke majak nambah.

“Tu nunjukka Perintah Sarawak pegai GPS udah ngemeratka guna rebak dudi ti tusah ngaga rumah ketegal nadai taba.

“Pekara tu suah dibantai pengari rayat ari menua pesisir ti deka SPK ditambah ba tiap kampung” ku iya.

Iya madah baka nya sepengudah meda pengawa nyerahka taba projek digaga Penerit Opis Tanah enggau Survei (JTS) Bagi Menua Betong Anthony Aboi ngagai kunterikta ungkup projek SPK Manggut fasa keterubah ba ditu, kemari.

Razi nyikap projek nya udah dikemendarka Perintah Sarawak nyadi siti inisiatif nyendiaka palan ti meruan lebuh ngaga siti kampung ti baru.

“Aku arap tu ulih dikena rebak dudi ti udah berumah tangga lebuh bisi ruang bilik kediri empu” ku iya.
Iya mega madah, mayuh projek SPK ti deka dikemansang lalu nganti pemendar ngambika perengka ba Saribas dudi ari ila.

NERANG.. Anthony Aboi (kiba) nunjukka taba ngagai Mohammad Razi Sitam lebuh dibai matau taba projek SPK Mangut fasa keterubah.