KUCHING: Struktur pelajar dalam bidang pelajar tumu nembiak (ECCE) udah diubah empas ari pandemik Covid-19 ti ngerekai menua.
Menteri Pengintu Pendiau, Pengelantang Komuniti, Orang Indu, Ruang Bilik enggau Pemansang Anak Mit, Datuk Seri Fatimah Abdullah madah kelas ECCE enda ulih dipejalaika baka selama ketegal nangika pengelikun nembiak.
“Ketegal pengerekai pandemik Covid-19, mayuh kelas ECCE semina dipejalaika ngena chara online lalu tu nyadi nyadi pemar besai ngagai bala pengajar dalam ngatur pekara dipelajar chara baru,” ku iya.
Dalam bejalaika pengawa nyikap renggat ngemanahka menua, kitai deka nentuka semua raban pengajar enggau pengereja di palan pelajar tumu nembiak mit udah tembu divaksin.
“Begulai enggau Opis Komiti Penyangga Penusah Nengeri (JPBN) enggau palan vaksinasyen ti dibungkur serata nengeri, bisi 98.08 peratus pengajar enggau pengereja di palan pelajar tumu nembiak mit di Sarawak udah mujur dituchuk vaksin.
“Pekara tu udah ngujungka semua palan ngibun nembiak enggau prasekula deka berengkah dibuka baru ngagai mensia mayuh,” ku iya.
Tandu iya mega, raban pengajar ECCE udah chukup nyikap diri bejaga napi chara baru tu lalu bekunsi penemu enggau belajar sentang chara pemadu engkeman napi ECCE,” ku iya.
Fatimah bejaku munyi nya maya bejadika Program Penerang Media Ngeluarka Buku Bekaul ECCE di The Waterfront Hotel Kuching, kemari.
Kelimpah ari nya, iya madahka raban pengajar udah bejalaika tanggungpengawa kena nentuka nembiak mit tu ulih bulih penemu prasekula taja belajar nengah chara online sebedau nyikap sida masuk ngagai sekula primari.
“Kena nyukung perambu semua prasekula ti deka dibuka maya musin pengerekai Covid-19 tu, Geran Khas Tahunan deka dikeluarka kena ngelempungka penusah belanja ti ditapi raban pengereja ECCE.
“Geran nya deka dikena meli kereban sebedau ngepun pengawa baka sengkabung idung, sabun jari sereta mayar servis sanitasyen ti dikena meresi instustisyen,” ku iya.
Aum besai tu diatur dikena bekunsi penemu sereta mutarka penanggul kena napi pemar maya dituntung penusah Covid-19 tu enggau sebedau menua kitai deka mindah ngagai renggat endemik enda lama agi.
