SIMANGGANG: Seraris enggau pemansang besai infrastruktur menua pesisir ti dibai perintah, komuniti dilalau ngerebut peluang dikena nambah sosioekonomi sida.
Kaban Parlimen Sri Aman, Datuk Seri Doris Sophia Brodie madah, utai segala enda datai bebelat lalu utai kempik enda datai terebai.
“Nya alai, dikena ngubah tikas pengidup enggau ngangkat sosioekonomi diri empu, komuniti enda patut semina nganti peluang aja.
“Sida patut proaktif ngena peluang ti bisi dikena ngerembai enggau ngansah pengelandik sida.
“Berebak enggau nya, aku ngarap komuniti di Sri Aman ngena manah semua bantu, pemansang, inisiatif enggau lalau ari perintah,” ku iya.
Doris mansutka jaku nya rambau bejadi Program Aram Ngabas Rayat @COOP Ngelaku Latih enggau Pelajar Koperasyen 2025 di Bagi Menua Sri Aman di siti hotel tebilang ditu, ensanus.
Enti dipeda nengah penembu Jalai Besai Pan Borneo enggau rentayan jalai alun ti majak meruan sereta nyambung mengeri enggau menua pesisir, ku iya, komuniti patut lengkas ngerebut peluang ti bisi.
“Kebuah pia ngambi jalai ‘emas’ tu ulih nyungkak ekonomi ti belimpah ngagai kita empu.
“Ba baruh pugu strategik keenam Strategik Pemansang Pengudah COVID-19 (PCDS) 2030, Perintah Sarawak meri perati ngagai pengawa nambah pemaik ekonomi enggau sosial ti ulih diasai sebela,” ku iya.
