“Tu siti ari jalai kitai ngaga pengawa dagang siti pelasar nambahka penatai pemisi diri.”

KUCHING: Program Young Entrepreneur Strive for Success (Yes) nyendia peluang ngagai rebak baru nyereta pengawa dagang.

Ex- Direktor SKM Sarawak, Basuini Ali madah program Yes siti program inovasyen alai nembiak sekula deka ngaga produk ngambika ulih dikomersial sereta dijual ba makit menua.

“Tu siti ari jalai kitai ngaga pengawa dagang siti pelasar nambahka penatai pemisi diri.

“Kita deka meda nembiak ukai semina bepanggau ba pengawa puang aja tang ba pengawa dagang,” ku iya.

Basuini madah munyi nya lebuh dirandau pemberita pengudah pengerami Nyerah Pengawa Direktor di Bilik Gerakan Begunan Sultan Iskandar ditu, tadi.

Nangkan nya ku iya, tu siti ari juluk ati SKM nengah Dasar Keusahwanan Nasional.

“Laban SKM tu ba baruh Opis Menteri Pemansang Pengawa Dagang, nya alai jukuk ati aku iya nya ngambika ulih madahka program dagang ba koperasi.

“Nengah Komiti Gerakan Koperasi, direktor begulai enggau komiti tu deka bekerejasama dalam bejalaika program koperasi,” ku iya.

Basuini madahka program Yes tu deka berengkah dipejalai ba selampur Sarawak bulan Ogos lalu dipejalaika ba bulan September ba renggat nasional.

Berebak enggau nya, Basuini madah ba konteks koperasi bedai, koperasi bejalaika tanggungpengawa mansutka orang dagang ti nyulut.

“Koperasi nengah Opis Pemansang Pengawa Dagang deka meda kaban ba koperasi lalu nguji nyual produk sida ngagai makit.

“Tu reti iya koperasi nyadi palan ngumpul produk sida ke bejalaika pengawa dagang lalu nyual produk nya ukai semina ba makit menua tang mega ke guna koperasi lain ba palan besemak nya,” ku iya.