GEMPUNG Parti Sarawak udah mai mayuh penyulut ngagai Sarawak nyengkaum pengawa negika hak Sarawak, sukut pelajar, pekara rama, pemansang ekonomi enggau ke bukai.

Pemikir Politik enggau Aktivis Rama Dr Abdul Kuddus Ramlee madah, taja pan GPS napi mayuh pemar dalam nyapai penyulut tu tang parti nya udah ngelaika pemansang ti dijapai Sarawak diatu ulih diasaika rayat.

“GPS mujur nyadi pelasar semua rayat Sarawak pupu raban bansa negika hak sida.

“Kelimpah ari nya, GPS mega udah mulaika hak Sarawak dibaruh MA63 pengudah Pengawa Bepilih Besai Ke-14 (PRU-14) lalu pengawa bebendar raban GPS dalam ngulihka hak bukai mega dipejalaika enggau chakah,” ku iya.

Iya madah, ngerintaika sekeda penyulut ti dibai GPS baka chukai jual nengeri lima peratus atas produk petroleum Sarawak, guna jaku English nyadi jaku rasmi, otonomi dalam pekara pelajar enggau status nengeri tu nyadi bakih kunsi lebuh numbuhka Malaysia.

“GPS seruran merambu enggau ngiga chara nambahka asil minyak menua ari lima peratus ngagai 20 peratus.”