KUCHING: Pengawa Perintah Sarawak ngemansang padang bilun antarabansa enggau palan penyangkai kapal tasik dalam di Kuching deka meransang Sarawak nyadi kuasa ekonomi baru di menua Asia.
Premier Sarawak, Datuk Patinggi Tan Sri Abang Johari Tun Openg madah ke dalam timpuh lima ngagai 10 taun ti deka datai, Perintah Sarawak enggau sektor peribit disadang deka beranakka puku urung RM100 billion dikena bejalaika dua projek besai nya.
“Dua projek besai tu deka meransang Sarawak nyadi kuasa ekonomi baru di menua Asia.
“Pelin Jalai Gas Sarawak (SGR) deka meda gas tulin diberi ngagai bagi menua bukai di nengeri tu dalam pengawa nentuka kitai ulih ngena mayuh agi gas dikena ngemansang ekonomi menua ari ti semina mengeksport ngagai menua bukai.
“Kelimpah ari nya, PETROS udah berengkah ngaga projek loji begulai kuasa turbin (CCGT) beungkus RM2 bilion dipelaba deka ngasilka 500 MW di Miri dikena nyungkak bekal kuasa di Utara Sarawak,” ku iya.
Abang Johari bejaku munyi nya dalam pesan serimbai Hari Krismas, ditu kemari.
Iya madah, nya kebuah Sarawak begunaka kuasa penuh ba bekal enggau pengawa ngagihka gas ngambi menua tu ulih bejalaika program ti meri penguntung penuh ngagai rayat Sarawak empu.
“Sarawak bisi hak ti sah dikena nguasa pengawa ngagihka gas nya.
“Munyi ku aku suba, pengawa dagang enda baka selama agi, Sarawak begunaka ekosistem ti deka mai ekonomi kitai ngagai jeman baru ba pemansang teknologi enggau ekonomi jauh baka sekeda menua di Timur Tengah, ti suba kitai meda palan tu semina padang pasir, baka UAE.
“Kelimpah palan penyangkai kapal tasik baru, aku andal ke perambu ngaga padang bilun antarabansa baru di Kuching deka nambahka siti da ‘x-factor’ ngagai ekosistem ti deka nempa Sarawak nyadi pematak ngagai pengawa dagang, beranakka puku enggau dagang temuai,” ku iya.
Iya madah, pengawa ngaga padang bilun baru ti lanchar nya endang belanja nengeri laban menua tu patut ngerumban agi pengawa dipejalai.
Ku iy, dalam semangat Hari Krismas ti penuh enggau pengarap, iya andal ke sekeda ari aset strategik ti deka ditemu ba menua deka dikemansang sereta meransang Sarawak dalam timpuh lima ngagai 10 taun ti deka datai.
Ku iya, taja perambu besai nya begunaka timpuh tang tu meh pengarap rayat ngangkatka Sarawak ngagai tikas ti deka ngengkahka menua sebaka enggau menua maju bukai.
“Enda disangkal agi kitai patut gawa bebendar ngasuh utai nyadi sereta nyeliahka diri ari tesat runding ketegal elemen ti deka agi meda kitai ba belakang sida belama,” ku iya.
