KUCHING: Serakup Sejarah Malaysia Pampang Sarawak deka bejalaika pansik Sejarah Borneo.
Chairman serakup nya, Datu Dr Neilson Ilan Mersat madah, pengawa nya dipejalai nengah Sempekat Pemereti Ati (MoU) enggau raban pemansik ari Kalimantan.
Ku iya, kerejasama nya mega deka ngerandang kerejasama enggau Serakup Sejarah Brunei.
“Serakup Sejarah Malaysia Pampang Sarawak udah bisi bejalaika kerejasama enggau raban pemansik ari Kalimantan nengah MoU.
“Kerejasama enggau bala pemansik ari Kalimantan tu mega deka ngerandangka kerejasama enggau Serakup Sejarah Brunei enda lama da dikena mansik Sejarah Borneo.
“Tambah mega, serakup kami deka nampung pansik bekaul Sejarah Sarawak enggau menua ti ngundan sejarah di Sarawak nengah pejalai ngelawa taba sejarah nya nyadi pengawa ninting taun,” terang iya.
Ilan nerang pekara nya ba Pengerami Makai Lemai Serimbai Penemuai Gawa diligit Serakup Sejarah Malaysia Pampang Terengganu, malam tadi.
Raban diligit nya betuai ke Chairman Serakup Sejarah Malaysia Pampang Terengganu, Datuk Muhd Yusof Abdullah disempulang 14 kaban serakup ti bukai.
Iya madah baru, Serakup Sejarah Malaysia Pampang Sarawak bisi ngatur kuiz Sejarah ba sekula di Sarawak nyadi program ninting taun dikena narak nembiak rindu ke subjek nya.
“Bala kami deka naka ulih ngatur kerejasama pansik enggau serakup Sejarah ari nengeri bukai di Malaysia.
“Bala kami mega nerima manah kaul kerejasama begulai kededua serakup tu dudi hari,” ku iya.
Ke penerang, diligit Serakup Sejarah Malaysia Pampang Terengganu bisi ngatur pejalai ngelawa Kampung Santubong dikena nyidi peranak Terengganu ti udah netapka diri diau mendam ba menua nya, ti udah datai ba tiga serak.
Pejalai raban nya mega sebagi ari tungkap Terengganu Diaspora ti dipejalaika serakup nya diatu.
