KUCHING: Gerempung Pengajar Bumiputera Sarawak (KGBS) nyangkal sekeda penguna media rama ti ngeluarka jaku bejai bala pengajar nyebut raban sida tu ‘makai gaji buta’ sekumbang timpuh Atur Tagang Pejalai (PKP).
Presiden KGBS Ahmad Malie madah taja bala pengajar enda nurun ke sekula maya tu, tang sida tetap bejalaika pengawa nengah ‘Pembelajaran dan Pemudahcaraan’ (PdPc) nengah internet.
“KGBS nemu situasyen ti ditapi semua piak maya PKP, tang kitai deka ngingatka penguna media rama ngambika enda ngeluar jaku ti bejai enggau ngutuk bala pengajar.
“Ambi ka chunto, jaku siku penguna media rama ba ‘facebook’ ti ayan ngasuh gaji pengajar diputung maya PKP laban ku iya pengajar semina diau ba rumah aja,” ku iya nengah sebengkah penerang, kemari.
Tandu Ahmad, orang nya ngeluarka jaku ti nyata bendar enda ngelala tanggungpengawa siku pengajar lalu semina deka mantai ke diri nyadi orang berani ngagai mensia mayuh.
“Ukai semina bala pengajar aja ti diau ba rumah maya PKP tang semua orang gawa perintah mega sama diau ba rumah kelimpah sida ti gawa ba baris luan.
“PKP tu atur ti dipejalaika perintah dikena nyaga pengelikun enggau pengerai rayat Malaysia kelebih agi nembiak sekula.
“Nya alai, KGBS nangkan mensia mayuh ngambika enda mending ke sebarang penemu ti semina deka ngeruga pemanah kaul rayat enggau tuduh ti jai,” ku iya.
