MARUDI: Lima pintu rumah panjai di Rumah Henry Gomes, Kampung Mission, Ulu Teru, Tinjar semina tinggal tiang tuga ba penusah karam di darat dini hari kemari, ngujungka 10 peranak tinggal gari ba punggung aja.
Nitih ripot tumu, penusah nya nuntung urung pukul 2 dini hari, tang nadai penusah bebadi nyawa.
Semua sida ti tasah datai ari enam orang besai tuai, tiga nembiak mit enggau siku orang tuai enda dipindah ngagai Palan Pengenduh (PPS) tang diasuh ngenduh ba rumah kaban belayan ke semak.
Endur penusah nyadi ba Pelilih Mit Tinjar, dipegai sitak Kaunsil Nengeri (DUN) Marudi enggau ari baruh Parlimen Baram.
Naka ripot berita tu dikeluar, raban bekuasa ngenuku nadai penusah bebadi nyawa tauka bakar dirikod ba penusah nya.
Raban bekaul deka berati ke utai diguna sida ke tasah, seraya penerang silik nyengkaum pun penusah deka dipadah belama.
