KUCHING: Genap pansik patut ngelui ari semina mansutka penerang enggau penemu aja, tang patut dibantai ba chara mutarka penanggul, peluang baru enggau penguntung ngagai mensia mayuh enggau ekonomi.
Menteri Pelajar, Inovasyen enggau Pemansang Penau, Datuk Sri Roland Sagah Wee Inn madahka pekara tu beguna ngagai Sarawak ti ngembuan pengaya biodiversiti, pengeraja asal enggau penau ti majak ngerembai.
“Pemar kitai iya nya ngubah aset tu nyadi penemu, inovasyen, industri baru enggau peluang ngagai rayat.
“Nya alai, pangku pengawa Palan Penyakit Berampit Sarawak (SIDC) nyadi pengatur begulai Aum Antarabansa Sarawak SHINE 2026 dipeda tau nyadi puku ti beguna ba pengawa negapka pengulih pansik biomedikal enggau penyakit berampit di Sarawak,” ku iya.
Sagah bejaku munyi nya rambau pengawa nutup Konferen Antarabansa Sarawak SHINE 2026 ba siti hotel ditu, tadi.
Ku iya, SIDC nyendia pelasar ngagai pemansik Sarawak ngaul diri enggau pemansik ba renggat nasional enggau antarabansa sereta ngena asil pansik nyadi chara mutarka penanggul.
Iya nangkan nya, meri pengaga ati ngagai penyereta enggau raban champion Pekit SRDC BrightSparx ke nerang penemu baru ngagai nembiak dikena ngerembaika ekosistem inovasyen Sarawak jemah.
“Raban nembiak ukai semina penerima penguntung ari ekosistem inovasyen kemaya hari tu, tang sida nyadi orang ti deka nempa penyulut nya jemah ila,” ku iya.
Iya mega beterima kasih ngagai kerejasama kaban antarabansa enggau serantau nyengkaum UKSEA-VAX Hub, sereta semua pemelanja enggau gerempung ti udah mantu ngenegapka ekosistem pemansik enggau inovasyen Sarawak tu.
Berebak enggau nya, iya madahka Pelin Tunga Bioekonomi Sarawak ti dipadahka Premier Sarawak kena ensana digaga nengah kerejasama Kaunsil Pemansik enggau Pemansang Sarawak (SRDC) enggau BioVerde Technologies Sdn Bhd (BVT).
Ku iya, randau begulai ti ngempuruka 50 raban tu mungkur pemain industri, pemansik enggau perintah diatur bagi ngenegapka kaul industri-pansik, ngerintaika pansik enggau meda guna makit sereta nempa jalai ti nyemetak ari makmal ngagai komersialisasyen.
Iya nangkan nya ngarapka pengawa SHINE 2026 ulih ditampung ngena chara ngenegapka agi kaul enggau kerejasama ti udah bisi sereta ngalihka penemu nyadi empas ti beguna.
