PEKAN NANAS: Projek nanam Golden Melon ngena sistem fertigasyen di Pengkalan Raja ditu ti dipejalai Gerempung Pekebun Genturung (PPK) Pekan Nanas diatu berengkah mansut asil.

Nya mega mandang pengelanchar pengawa ngena teknologi moden ba sektor betanam betupi.

Chairman Komiti Betanam Betupi, Industri Pengawa Bekebun enggau Pemansang Menua Pesisir Johor, Datuk Zahari Sarip madah, projek nya nerima sukung tegut ari perintah nengeri.

Iya madah, pekara nya ulih dipeda lebuh Opis Menteri Betanam Betupi enggau Jamin Pemakai (KPKM) meri bantu belanja sepenyampau RM250,000 ba taun nyin kemari dikena nyukung projek nya.

“Dulu ari tu, aku bisi ngabas Rumah Nyaga Ujan (RPH) Kak Hasnah lalu diatu aku ngabas RPH Rohani ungkup ngetau asil kebun,” ku iya lebuh ngabas tiga RPH ti ngembuan 3,000 kantung poli.

Terang iya, kelimpah nambah produktiviti asil kebun, inisiatif nya nyadi chunto ngagai pengawa ngena teknologi moden ba sektor betanam betupi.

“Nengah sukung teknologi moden, sektor betanam betupi majak efisyen enggau besemekih agi seriris enggau Agenda Jamin Bekal Pemakai Nengeri Johor.

“Terima kasih ngagai Kaunsil Gerempung Pekebun (LPP) Nengeri Johor enggau PPK Pekan Nanas berindik ari komitmen sida nyungkak pemansang sektor betanam betupi nengeri.

“Sida chakah mantu ba pengawa ngelaku sawit, nyendia input betanam betupi, numbuh kedai pekebun enggau projek nanam sayur.

“Inisiatif tu dikearap ulih terus ditegap ngambi pemaik ari pekara tu ulih diasai ke mayuh peranak lokal kelebih agi bala pekebun di genturung nya,” ku iya. – FN