BINTULU: Kaban Kunsil Nengeri (ADUN) Jepak, Iskandar Turkee minta siti Raban Bomba Volunteer ditumbuh ba sitak Setulan dikena nyamin pengelikun peranak lokal.

Ku iya, inisiatif nya beguna endar nentuka komuniti semampai sedia napi sebarang penusah enda disadang nyadi kelebih agi penusah angus enggau penusah ngenyit ba renggat komuniti.

“Aku ngarap komuniti ba sitak Setulan ulih numbuh Raban Bomba Volunteer khas ungkup sitak tu.

“Aku udah merambu pekara sama ngagai peranak Kampung Jepak di baruh pegai Penghulu Idil Ismail lalu aku andal tu ulih dikemujur ba sitak Setulan.

“Aku ngelempai tu ngagai Tuai Opis Bomba enggau Penyah Penusah Malaysia Zon Bintulu, Wan Kamaruddin Wan Ahmad, Penghulu Isa Megong sereta tuai rumah ditu ngambi ngemujur pengawa tu,” ku iya.

Iskandar madah munyi nya lebuh bejadika Program Kitai Likun kolaborasyen Opis Bomba enggau Penyah Penusah Malaysia (JBPM) Sarawak enggau PETRONAS Carigali Sdn Bhd Sarawak- Asset ti diatur di Rumah Tiut Usit, Sungai Setulan, Jalai Pesisir Jepak-Kuala Tatau, Hari Satu tu tadi.

Ku Iskandar, pengawa raban nya ukai semina nyadi raban ba luar mutar penusah angus seraya meri bantu tumu sebedau datai ngagai raban bomba profesional, bejalaika latih pengelikun sereta narak pengeleda komuniti pasal nagang penusah angus.

“Pengawa numbuh Raban Bomba Volunteer tu seraris enggau aspirasyen perintah nengeri ngangkatka Sarawak nyadi siti nengeri ti likun enggau lantang manggai taun 2030,” ku iya.

Program dua hari ti belabuh Hari Minggu tu tadi ngempuru 100 penyereta nengah kelas teori sereta praktikal pengelikun nyengkaum simulasyen ngerara penusah angus enggau peneleba ngena uniform api bomba.