KUCHING: Perintah Sarawak ngemendar agih belanja tambah RM100,000 dikena nyaga adan menua di menua pesisir di nengeri tu ti berimbai enggau Indonesia.

Sapit Kepala Menteri ke mega Chairman Komiti Mit Pengelikun, Tan Sri James Jemut Masing madah, bisi tiga adan menua ke baru ke deka dijaga enggau terit.

“Tiga adan tu nyengkaum Tapak Megah enggau Rantau Pendora di Sungai Rajang sereta Ulu Undop di Sri Aman.

“Tapak Megah enggau Rantau Pendora urung 120 kilometer ari pasar Kapit iya nya berimbai enggau menua Kalimantan, Indonesia,” ku iya madah ngagai Suara Sarawak ensana.

Kenu ku Masing, urung 26 iku raban penyaga pengelikun dianjung ngemataka kededua adan menua tu berengkah 10 March nyentuk 9 Mei ila.

“Adan ketiga iya nya ba Ulu Undop, Sri Aman ke bepalan semina lima kilometer ari Rumah Lang.

“Pintu penama adan tu suah ditengah rayat Indonesia ke Sarawak enggau tuju bejual,” ku iya.

Taja pia, tandu iya berindik ari pandemik Covid-19 enggau Atur Tagang Pejalai (PKP) diterit, penatai rayat Indonesia ke Sarawak ditagang penuh.

“Adan tu dijaga dikena nagang penatai rayat Indonesia enggau chara nadai pemendar bejual ke Sarawak seraya dikena nagang pengerekai penyakit Covid-19.

“Urung 15 iku polis udah dianjung bejejaga ba palan nya,” ku iya.

Dulu ari nya, Kepala Menteri Datuk Patinggi Abang Johari Tun Openg madah agih belanja tambah ba Kapit dikena meli keresa dikena nyaga adan entara menua di menua pesisir Sarawak (Malaysia) enggau Indonesia sekumbang PKP.

Kenu ku iya, pengelikun ba adan entara menua meseti diterit dikena nagang penatai rayat menua luar ari sepiak bejalai ke Sarawak sekumbang timpuh PKP.

Tambah mega, timpuh PKP udah ditampung nyentuk 28 April tu baka ke udah disebut Menteri Besai Tan Sri Muhyiddin Yassin kena Hari Lima tu tadi.