Duna Ranggau siku penanyi Iban ke majak pegari dikerinduka mensia mayuh pengudah pemujur ngangkatka diri nengah sekeda tebilang iya baka Semampai Laku enggau ke bukai.
Dalam album lagu-lagu iya Duna mayuh nyadaka lagu sentang kisah pengidup berumah tangga, dunya pengerindu sereta ke bukai.
Nyerumba Atur Tagang Pejalai (PKP) tu tadi, Suara Sarawak ngaga awak ngerandau Duna ti chukup enda kakang bekunsika jalai pengidup ba dunya pemerindang.
Kenu ku Duna, iya kala pansut enggau album kompilasi baruh perabung All Time Best Production enggau album solo keterubah Pelepa Rangkang Pemali baruh perabung Golden Pearl Recording Studio di Kuching taun 2012.
PENEPAN BARU
Tang diatu, iya udah bisi penepan baruh enggau Assapai Music Production nengah album baru dikumbai Beretan Ba Siti Pengerindu.
“Nyerita sentang album baru iya Beretan Ba Siti Pengerindu,buah penemu tauka leka lagu ke bisi dalam album tu diambi ari perati gaya pendiau pengidup diri empu kelimpah ari ulah mensia mayuh sereta agi mengkang ngena rentak baka album keterubah suba.
“Aku nemu peminat aku endang rindu ke tiun muzik baka nya lalu aku mega nemu sida nyukung aku belama taja lama enda ngeluarka album,”ku iya.
Dalam album Beretan Ba Siti Pengerindu ti mai tiun genre Balada, ,Agogo enggau rentak Dangdut dikeluarka Assapai Music Production sereta udah berengkah dijual ba bulan Mei 2019 ti ngundan asil keranjai jari lima iku penengkebang lagu tebilang Iban baka Trinity Igu,Maxwell Franklin Saran,Goretti Sameh enggau Aba Jared nyengkaum Duna empu.
“Semua lagu dalam album tu dirikod ba Studio Iskandar Bujang ba Sibu lalu video klip digaga sebelah menua Miri,Sibu enggau ba penatai asal aku empu iya nya ari Kampung Spaoh Simunjan.
BERETAN BA SITI PENGERINDU
“Entara lagu dijangka meletup ba album Beretan Ba Siti Pengerindu iya nya lagu Beretan Ba Siti pengerindu (Duna),Aku Ke Tasik Nuan Ke Laut (Trinity Igu) enggau Semampai Laku (Duna).
Tiun lagu dalam album tu mega ditengkebang empat iku penengkebang muzik tebilang Iban iya nya Hillary ti kala tebilang enggau lagu Kumang Malaysia.
Udah nya, ba lagu Aku Ke Tasik Nuan Ke Laut,Beretan ba siti pengerindu ditempa Dudi Joseph, Davney David enggau Iskandar Bujang.
Mulaika pengingat mega, Duna madah diri kala menang dua kali lebuh nyereta pekit belagu diatur Online Entertaiment ba taun 2016 suba.
Ngelansa pasal penerang diri, ku Duna iya anak pengkuan ari empat diri menyadi.
Taun tu, umur udah manggai 33 taun lalu udah nirika rumah tangga. Diatu iya endang bisi ngembuan pengawa tetap ba sebengkah opis perintah di Sibu.
Tikas pelajar diri, iya bisi ngembuan Ijazah Sarjana Muda ari Universiti Malaysia Sarawak (Unimas) ba Kus Pengatur Seni.
“Meri besai terima kasih nuju Jackson Salam iya nya siku bakih ti keterubah mai aku sama ngeruh ai ba dunya pemerindang kitai Iban sereta bakih Jennarino Jeraki iya nya orang beempu Serikat Golden Pearl Production di Kuching ditu laban udah meri aku peluang alai mantaika sada nyawa ngerikod lagu ba taun 2012 suba.
“Enda tinggal nuju apai enggau indai aku ke endang semampai nyukung kenyau ari mit kelimpah bala ipar,kaban belayan enggau bala bakih ke bukai.
“Nuju bala peminat ti seruran meri sukung kenyau ari album kompilasi nyentuk ke diatu,terus ke sukung kita lalu anang leju sama nyukung industri muzik kitai Iban laban enti nadai peminat sapa mih kami,” ku iya.
Ngelansa pasal VCD Album Beretan Ba Siti Pengerindu mensia mayuh ulih ngiga ba sebelah kedai muzik besemak selampur Sarawak sereta tau meli nengah chara online.
Penerang silik tau lawa ngagai laman Facebook Assapai Music Production enggau Facebook Duna Ranggau empu, ku iya.
Sebedau nutup jaku, Duna sempat ninggalka jaku pesan pasal pengerekai penyakit Covid-19, iya minta mensia mayuh bela nitihka atur PKP jam ke diatu.
Anang sesekali nguji ngelanggar atur perintah lalu kemeratka mih pengerai diri. Jam diatu jenuh aja ba rumah, buka youtube lalu dinga mih lagu-lagu Iban ke tau ngasuh ati rindang baka lagu Semampai Laku, ku iya seraya bebuti.
