KUCHING: Pengawa nyidi raban bujang berani soldadu veteren terus chakah dipejalaika kelebih agi ngiga raban Iban Tracker enggau Sarawak Renjer.
Penyanding Penemu Gerempung Veteran Renjer Sarawak enggau Gerempung Veteran Soldadu Kor Renjer Sarawak (PVTKR) Lt Jeneral Datuk Stephen Mundaw madahka naka diatu urung 223 iku raban tu udah mujur ditemu.
“Kami deka terus ngiga sida tu kelebih agi Iban Tracker, tebal agi sida diau ba menua pesisir ngambika kami ulih mantu sida.
“Kelimpah ari nya, kitai mega nyidi Sarawak Renjer, kami bisi rintai nama tang bedau penuh, agi mayuh sida bedau ditemu,” ku iya lebuh aum media Pasal Penerima Midul Veteren Soldadu Iban Tracker enggau Sarawak Renjer di Indu Opis Pekara Veteren Soldadu Malaysia (Sarawak) ditu, ensana.
Ku iya, pengawa nyidi nya deka diteruska ngiga 1 Renjer iya nya Batalion Keterubah Renjer pengudah menua Merdeka.
“Aku ngarapka, raban ejensi bukai ti nemu pasal orang nya siku veteren soldadu madah tauka meri penerang ngagai kami.
“Aku mega meransang, raban vateren ngambika nyadi kaban gerempung awakka muntang endur kami meri bantu tauka bantu bukai ti patut,” ku iya.
Iya mega muji pengawa bekaul enggau 17 iku Iban Tracker enggau Sarawak Renjer ti nerima pangkat basa Pingat Perwira Negeri (PPN) (Engkeraju) di Sibu kena 3 November tu tadi.
“Tu siti sejarah ngagai kitai laban tu PPN ti keterubah diberi ngagai veteren Iban Trackers enggau Sarawak Renjer.
“Midul tu nyadi kelai basa enggau aku ti amat tinggi ngagai bujang berani ti bebendar berambun nyawa ngetanka menua lebuh agi siga suba,” ku iya.
