10 pintu lus pengereja ladang di Batang Lassa angus lengis

SIBU: Urung 10 pintu lus pengereja ba sebuah ladang di Batang Lassa semak ditu angus lengis ba penusah ke nyadi tengah malam tadi.

Palan Operasyen Bomba Sarawak ba sebengkah penerang tadi madahka Balai Bomba enggau Penyah Penusah (BBP) Sungai Merah nerima kangau ngenyit utung pukul 12.30 pagi.

“10 raban bomba enggau sebuah kereban FRT enggau ERMS betuaika PB Johnny Anyom udah ngesah ngagai endur penuesah nyadi.

“Semua pengereja ke diau ba lus nya nadai apa nama taja raban bomba napi pemar ngerara api laban semina bepanggai ba ai parit,” ku penerang nya.

Komander operasyen madahka kereban sida enda ulih tama ngagai endur penusah nyadi laban jalai sekut enggau rusak.

Ke penerang, takah ari balai ngagai endur penusah urung 47 kilometer (km) lalu takah entara kereban ngelawa endur penusah urung 17 km.

Berindik ari nya, raban bomba semina ulih ngena entukar 4WD mai kereban dikena ngerara api ngagai endur nya.

Operasyen tembu pukul 5 pagi lalu nyentuk berita tu ditulis, pun penusah enggau pengerugi agi dipansik.