KUCHING: Pengeransing Sapit Premier Sarawak, Datuk Amar Douglas Uggah Embas ngabas jalai menua ulu nengah XPDC 1.0 Bario ba taun 2025 dipuji komuniti Kenyah enggau Penan di Kedaya Telang Usan, Ulu Baram.
Pekara nya dipadah diligit Komiti Kedaya Telang Usan ti diulu ke Temenggong Joseph Ngau Lian lebuh ngatur penuemai basa ngagai Uggah di Kompleks Kunsil Nengeri (DUN) Sarawak, ditu ensanus.
Ekspedisyen penyauh 375 kilometer ari Miri ke Bario ti disempulang Uggah begulai enggau pegawai Opis Kereja Raya (JKR) Sarawak dikena ngabas jalai batang ti nyadi jalai besai komuniti menua ulu.
Pengawa nya dikena ngempu enggau ngazet jalai batang nyadi jalai nengeri nentuka pengawa ngaduka jalai dipejalai manah agi sereta nyamin pengelikun penguna.
Uggah nyemetak madahka Perintah Sarawak deka terus meri perati ngagai pemansang menua ulu, kelebih agi Telang Usan enggau Mulu.
“Perintah Sarawak deka terus meri perati ngagai pemansang menua ulu, nyengkaum Telang Usan enggau Mulu nentuka rayat ngasai perengkauna pemun sereta peluang pemansang ti menyana agi.
“Kitai mega dekaka komuniti ngasai mayuh inisiatif perintah, kelebih agi ba bidang pelajar dikena ngemansang modal mensia Sarawak,” ku iya.
Nangkan nya, Joseph ti mega Tuai Komuniti Raban Bansa Kenyah Bagi Menua Miri madahka Kedaya Telang Usan nyerangkung 27 rumah panjai enggau genturung pendiau ti diau udah ngasai ke bekal kuasa karan pengelama 14 jam sehari nengah Skim Bekal Kuasa Karan Menua Pesisir Alternatif Sarawak (SARES).
Ku iya, jalai enggau jematan nuju 15 palan pengentap udah diaduka nengah projek Ejensi Pemansang Tanah Tinggi (HDA) enggau JKR Sarawak, lalu nyau deka semua genturung pendiau bisi akses ngagai servis telefon enggau internet.
Ungkup fasiliti bekal ai beresi, siti projek udah tembu lalu dua da benung diadu HDA.
Penemuai basa ti diatur serimbai hari keempat Aum Kedua Penggal Kelima Aum DUN Sarawak nya mega digulu Sapit Menteri ba Opis Premier Sarawak (Pengereja Kasar, Imigresyen enggau Patau Projek) ti mega ADUN Mulu, Datuk Gerawat Gala.
Ba komuniti Ulu Baram, pengawa ngaduka rentayan jalai ulih semina ngemuntang pejalai, tang mega mai pengadang ngagai akses servis pemun enggau peluang pemansang ti menyana agi ungkup rebak dudi. — SF
