KUCHING: Lebih 10,000 pakar teknologi ari serata dunya disadang bemalam ba mengeri tu ngulu dua pengerami teknologi antarabansa ke deka diatur ditu.
Dua pengerami nya baka Aum Besai Inovasyen enggau Teknologi Dunya 2023 (WCIT 2023) enggau Aum Besai Ekonomi Digital Antarabansa Edisyen Keenam Sarawak (IDECS 2023).
Sekretari Perintah Sarawak, Datuk Amar Mohamad Abu Bakar Marzuki madah, dua pengawa nya deka diatur seretai iya nya kena 4 ngagai 6 Oktober tu ba Palan Aum Borneo Kuching (BCCK).
“Dua pengawa tu diatur begulai deka ngempung sekeda pemain besai dalam industri teknologi pemadu tebilang.
“Tu nyengkaum pemelanja tunggal pemadu besai dalam sejarah WCIT iya nya Huawei ke mega pemelanja platinum,” terang iya.
Abu Bakar nibar jaku nya ba aum pemberita pengudah betuai ke aum keterubah Komiti Pengatur WCIT 2023 enggau IDECS 2023 ba Wisma Bapa Malaysia.
Sama datai Sapit Chairman Begulai WCIT, Tan Sri Datuk Amar Mohamad Morshidi Abdul Ghani, Chairman gempung Inovasyen, Teknologi enggau Servis Dunya (Witsa), Dr. Sean Seah sereta Chairman Gerempung Industri Komputer enggau Multimedia Malaysia (Pikom) Ong Chin Seong.
Ngelansa silik, Abu Bakar ke mega Chairman WCIT 2023 madah, eksibisyen kededua pengawa nya mega deka mandangka sekeda inovasyen pemadu manah enggau betikas dunya.
Ku iya, nya baka teknologi Artificial Intellegence (AI), mengeri pintar, robotik, angkasa enggau ke bukai.
“Semua tu enggau tuju nyungkak pemansang ekonomi, pekara rama enggau pemeruan rampa menua,” terang iya.
Ku Abu Bakar, pengawa ngatur WCIT 2023 enggau IDECS 2023 nya dikena ngemujur inisiatif Sarawak ba pemansang ekonomi digital seraya nyendiaka peluang beranakka puku e-dagang enggau infrastruktur digital.
Terang iya, inisiatif nya mega udah nentu ke Sarawak nyadi pintu penama ngagai Asia Tenggara kelebih agi diatu semua adan menua antarabansa udah dibuka enggau dagang majak maju.
