KUCHING: Bisi 126 buah sekula mission ba Sarawak bulih pemaik nengah Bantu Belanja Sekula Mission Renggat Kedua penyampau RM17 juta.
Chek nya disua Sapit Sekretari Perintah Sarawak, Datuk Buckland Bangik ngarika Sapit Premier Sarawak, Datuk Amar Douglas Uggah Embas ba Kunsil Nengeri (DUN), ditu tadi.
Pia mega, chek nya disua ngagai tiga penyanding penemu enggau tiga pengari penyanding penemu ngagai Mission Authorities.
Ku Buckland, bisi 50 chek penyampau RM6.7 juta disua ngagai Penyanding Penemu Anglican Diocese of Kuching, Datuk Seri Roland Sagah Wee Inn, 31 chek penyampau RM4.1 juta ngagai Penyanding Penemu Roman Catholic Archdiocese ngagai Datuk Dr Penguang Manggil enggau 23 chek penyampau RM3.1 juta ngagai pengari Datuk Snowdan Lawan ke mega penyanding penemu Roman Catholic Archiodese of Sibu.
Nangkan nya ku iya, tujuh chek penyampau RM944,440 disua ngagai Penyanding Penemu Roman Catholic Diocese of Miri, Datuk Seri Lee Kim Shin, bisi lapan chek penyampau RM1.07 juta disua ngagai pengari, Datuk Seri Alexander Nanta Linggi ke nyadi penyanding penemu Methodist, Sarawak Iban Annual Conference (SIAC) enggau tujuh chek penyampau RM944,440 ngagai pengari Datuk Seri Dr Stephen Rundi Utom ke nyadi penyanding penemu Methodist, Sarawak Chinese Annual Conference (SCAC).
“Ngarapka sekula ti udah nerima bantu belanja sekula mission semampai nitihka atur ngena belanja tu,” ku iya.
