BALAI RINGIN: Komiti Penyangga Penusah Bagi Menua (JPBB) Serian udah muka siti Palan Pengenduh (PPS) ungkup peranak ti dituntung penusah ketegal bah ba Kunsil Nengeri (DUN) Balai Ringin berindik ari ai niki ketegal ujan bangat enda ngetu kenyau ari berapa hari ti udah.
PPS nya belabuh dibuka kena 9 Januari tu tadi pukul 12 tengah hari lalu dibuka ba Depo Balai Ringin ke alai, naka diatu, palan nya ungkup raban tasah bah ari Kampung Ensabang Pelaie ngaul 37 Tuai Bilik (KIR).
Bisi 150 raban tasah bah dirikod ba PPS nya nyengkaum orang besai tuai, nembiak mit, anak mit baru ada, orang tuai sereta Orang Nyelai Pendiau (OKU).
Pengawa mindah nya nyadi chara tumu dikena nyamin pengelikun peranak ari sebarang risiko bah ti nuntung genturung pendiau nya.
Atur enggau pengawa matau operasyen PPS dipejalai ejensi nengah JPBB Serian begulai enggau Raban Penyaga Orang Periman Malaysia (APM), Polis DiRaja Malaysia (PDRM) sereta raban bekuasa lokal nentuka pengelantang enggau pengelikun raban tasah semampai dijaga.
Nya alai, mensia mayuh kelebih agi peranak ba endur ti baruh enggau bisi risiko bah semampai bejimat sereta nitih ke gerah enggau penerang pemadu baru ti dikeluar raban bekuasa. – EDISI UKAS
