KUCHING: Bisi 20 atlit Sarawak ti nyulut ba Lumba Orang Bengal Malaysia (SOPMA) XXII nerima insentif sepenyampau RM60,000 dikena ngaku penyulut sida ti ngemegah nengeri tu.
Laban ti nyadi tuai rumah ngatur pekit nya ba taun tu tadi, Sarawak ngerikod penyulut ti ngemegah pengudah bulih semilan midul emas, empat pirak enggau tujuh engkeraju.
Nya ngujungka nengeri tu mujur ngetan penuduk kedua ari 14 nengeri ti bepekit.
Menteri Pemansang Indu, Nembiak Mit enggau Pengelantang Komuniti Sarawak, Datuk Seri Fatimah Abdullah madah, penyulut nya mandang komitmen tinggi atlit kitai.
Iya madah, nya mega mandang tikas pengasi sukung betampung perintah nengeri ngagai pemansang lumba komuniti bengal.
“Penyulut kontinjen ti majak niki ari penuduk keempat ngagai penuduk ketiga lalu diatu ba penuduk kedua mandang Sarawak ba pelasar ti nemban ngerebut gelar champion ba pekit tu dudi hari.
“Nengah disiplin, pengeransing enggau sukung tegut semua raban, aku pechaya kitai ulih nyapai gelar champion,” ku iya.
Fatimah bejaku munyi nya rambau Program Nyua Insentif enggau Anugerah serimbai SOPMA XXII Sarawak 2025 ditu, ensanus.
Iya madah, perintah nengeri diatu rasmi ngemasukka empat kategori lumba Orang Nyelai Pendiau (OKU) ba baruh perambu opis menteri.
Ku iya, nya nyengkaum lumba atlit bengal, buta, atlit begunaka perengka intelektual (Special Olympics) enggau para. Tampung Fatimah, lumba nyadi pelasar beguna dikena negap raban OKU kelimpah ari pelajar.
“Nengah lumba, kitai ulih negap raban OKU.
Pekara ti dipandang bala atlit kitai iya nya semangat besemekih, pengeransing enggau disiplin ti tinggi lalu tu mih resipi penyulut,” ku iya.
Nangkan nya, iya meri terima kasih ngagai Premier Sarawak berindik ari sukung inklusif ba pengawa meri insentif nyengkaum agih belanja penuh sepenyampau RM399,000 ngagai 14 nengeri ti bulih midul.
Program nya ngemataka Anugerah Tokoh Sarawak 2025 diberi ngagai Siw Sing Hie, Anugerah Jurulatih Sarawak 2025 Kategori Tenping Bowling, Anugerah Pengandal Olahragawati Bengal Sarawak 2025 diempu Qasih Amani Anisa Mahsin.
Pia mega, Anugerah Olahragawan Bengal Sarawak 2025 dipenggi Agan Ballang Kapong lalu Sia Chew Ing ngempu Anugerah Olahragawati Bengal Sarawak 2025 sereta Anugerah Olahragawan Bengal Sarawak 2025 diberi ngagai Syafiq Phua Fadhlee Phua. – EDISI UKAS
