KUCHING: Bisi 24 iku staf SeDidik Sarawak nerima Anugerah Servis Nyulut (APC) pengudah nunjuk prestasi pengawa ti nyulut sepemanjai taun 2023.

Menteri Pemansang Indu, Nembiak Mit enggau Pengelantang Komuniti Sarawak, Datuk Seri Fatimah Abdullah madah, pengawa nyua APC nya siti chara ti dikena SeDidik Sarawak meri pengaku ngagai staf ti nunjukka prestasyen pengawa ti nyulut.

“Penisih dikena nentu penerima anugerah tu bepelasar ke penyelai, penetap enggau pemesai reti anugerah nya empu.

“Nyadi aku pechaya, genap penerima tentu beterima kasih ke pengaku ti udah diberi laban nya berega,” ku iya.

Iya nyebut pekara nya ba Pengawa Apresiasyen SeDidik Nyerumba Genap Taun Ke-33 ditu, malam tadi.

Fatimah madah baru, pengawa baka nya meri semangat ngagai semua staf SeDidik Sarawak gawa enggau nyulut sereta ransing agi.

Ba pengawa nya mega bela dirami semilan staf SeDidik Sarawak ti udah enggau deka pinchin ba taun tu.